Qyzylorda oblysynyń ákimi Qýanyshbek Ysqaqov búgin «Batys Eýropa - Batys Qytaı» kúre joly boıynda ornalasqan qyzmet kórsetý keshenderindegi tótenshe jaǵdaı kezindegi qaýipsizdik sharalarymen tanysty. Bul týraly oblys ákiminiń baspasóz qyzmeti habarlaıdy.
Alǵashqy nysan Syrdarııa aýdanyndaǵy «Nurly-Jol» kesheni boldy. Jalpy aýmaǵy 2 gektar aýmaqta kólik jóndeý jáne jýý oryndary, qonaq úı, kafe, 40 oryndyq meımanhana jáne kólik turaǵy bar. Keshende sanıtarlyq-dezınfeksııalyq jáne zalalsyzdandyrý jumystary júrgizilip turady. Bir mezette tek 50 adamǵa ǵana qyzmet kórsetýi tıis. Budan ári aımaq basshysy osy aýdandaǵy «Kerýen» keshenine aıaldady. Munda da vırýstyń taralýyn boldyrmaý maqsatynda ýaqytsha shekteýler engizilgen.
Sondaı-aq, «Qyzyl-Orda» qyzmet kórsetý kesheninde de tazalyq, zalalsyzdandyrý jumystary kúsheıtilgen. Jaýapty mekeme tarapynan kún saıyn tekserý júrgiziledi. Aımaq basshysy aýdan ákimi Rýslan Rústemov pen nysan ıelerine tótenshe jaǵdaı talaptaryn saqtaýdy tapsyrdy.