«О́ńirlerdi damytý – 2020» baǵdarlamasy aıasynda respýblıkalyq bıýdjetten bólingen qarjyǵa «Qyzylorda sý júıesi» mekemesine qarasty oblys ortalyǵyndaǵy 62 stansııanyń 23-i qaıta jańǵyrtylyp jatyr. Jobanyń kelesi kezeńinde taǵy 31 stansııa jańarady.
Qala ákimi baǵdarlama sheńberinde jasalyp jatqan jumystar sapasyn kórip, merdigerlerge óz usynys-pikirlerin aıtty. Jalpy qaladaǵy 62 stansııanyń 8-i ǵana jańa, qalǵany ótken ǵasyrdyń 60-70-shi jyldary salynǵan. Osyǵan deıin aǵymdaǵy jóndeýden ótkeni bolmasa, kóbiniń tozyǵy jetip turǵan edi.
2016 jyly qala ákimdigi joba jasap, kelesi jyldan bastap respýblıkalyq bıýdjetten qarjy bóline bastady. Sońǵy úsh jyl bederinde osy maqsatqa 2 mlrd teńgeden astam qarjy qaraldy.
– Kónergen stansııalardyń kesirinen qalany jaǵymsyz ıis jaılap alǵany jaıly turǵyndar shaǵymyn jıi estımiz. Tipti, byltyr jóndeý jumystarymen aınalysyp jatqan birneshe azamattyń gazǵa tunshyǵyp qaıtys bolǵanyn da bilesizder. Sondyqtan da, el qaýipsizdigi úshin káriz sorǵy stansııalaryn jańartýǵa basa mán berip otyrmyz. Jıyrma úsh stansııa bıyl mamyr aıynda tolyq jańartylyp bitedi, –dedi qala ákimi.
Olarǵa Shvesııada jasalǵan jaryq únemdegish sorǵylar men qatty qaldyqty untaıtyn avtomatty qondyrǵylar ornatylady. Al jeldetkish súzgi kómirtek totyǵy gazyn atmosferaǵa tazartyp shyǵarady.