Elimizde tótenshe jaǵdaı rejımi jarııalanǵanyna búgin týra 9 kún boldy. Bastapqyda jer-jerde qurylǵan komıssııalar qaýyrt jumys istep, turǵyndarǵa túsindirý jumystaryn júrgizdi. Ile-shala elimizdegi eki megapolıs – Nur-Sultan men Almaty qalalary karantınge jabyldy. Ádepkide karantın talaptaryn túsinbegender kóp bolǵanymen qazir bul eki shahar tirshiligi de óz arnasyn qaıta tapqan sııaqty.
Al ózge aımaqtardaǵy ahýal qalaı bolyp jatyr?! Mysaly, Almaty men Nur-Sultan nemese irgemizdegi Shymkent, Aqtóbe shaharlary sekildi úlken bolmaǵanymen Qyzylorda qalasynyń da tirshiligine kádimgideı ózgeris endi. Oblys ortalyǵyndaǵy saýda oryndary men bazarlar birlen baqylaýǵa alyndy. Toǵyz kúnniń ishinde reıdter men tekserýler úzdiksiz júrgizilip, biraz másele sheshimin tapty. Qazir qalaǵa kiretin, shyǵatyn joldarǵa baqylaý beketteri qoıyldy.
Shahar ishinde burynǵydaı shýly tirshilik joq. Temir jol vokzaly temirdeı tártipke keltirilgen. Jolaýshy izdep, perronǵa deıin shyǵyp ketetin taksıster múldem kórinbeıdi. Perronǵa shyǵatyn qaqpalar jabylǵan. Tek ǵımarat arqyly shyǵa alasyz. Bılet satatyn kassalarǵa adamdardyń birtindep kirýi baqylaýǵa alynypty.
Ánsheıinde tirshiligi qaınap jatatyn perron tym-tyrys. Vokzal qyzmetkerleriniń aıtýynsha poıyzben qatynaıtyn jolaýshy da sıregen kórinedi.
Vokzaldan shyǵyp, qalany qaq jara ótip, oblys ortalyǵynyń irgesindegi Tasbógetten toqtaıtyn № 11 marshrýtqa otyrdyq. Ishte jolaýshy az, kondýktor buryn marshrýttyń basy men aıaǵyna jetkenshe bir saǵat júrse, qazir ol ýaqyt eki esege jýyq qysqarǵanyn aıtady. Aıaldamalarda da burynǵydaı jolaýshy terip turmaıtyn bolǵan.
Qaladaǵy iri saýda ortalyqtarynyń biri «Jaına» bazarynda da kisi aıaǵy sırepti. Adam men kólik aǵyny úzilmeıtin Qazybek bı kóshesiniń boıy da alabóten typ-tynysh.
Mádenıet úıleri men mýzeılerdiń syrtynda jumystaryn ýaqytsha toqtatqandary týraly eskertpe ilinip tur. Qala ortalyǵyndaǵy Batyrhan Shókenov saıabaǵynda da qulaqqa urǵan tanadaı tynyshtyq ornaǵan.
Qala ákimi baspasóz qyzmetiniń habarlaýynsha shaharda tótenshe jaǵdaı talaptarynyń saqtalýy qatań qadaǵalaýda tur. Arnaıy qurylǵan komıssııa kún saıyn tekserý júrgizýde.
Qalada qarbalas azaıǵanymen halyqqa asa qajetti qyzmet salalarynyń jumysy kóbeıdi. Ásirese, qazir sálemdemelerdi, túrli tapsyrystardy úıge jetkizip beretinderdiń kúni týyp tur.
QYZYLORDA