Elimizdiń turǵyndaryn koronavırýsqa tekserýdi «Olımp» klınıkalyq-dıagnostıkalyq ortalyǵy qolǵa alady. Olardyń málimetinshe, ekspress-testten ótý quny shamamen 4000-5000 teńge aralyǵyn quramaq.
Bul testten aldymen koronavırýsty juqtyrǵan adamdarmen jaqyn baılanysta bolǵan azamattar ótedi. Mundaı turǵyndardy saraptamadan tegin ótkizýdi «Sábı» qaıyrymdylyq qory moınyna alyp otyr. Ol úshin azamattar «Olımp» KDO resmı saıtyndaǵy arnaıy usynylǵan anketany toltyrýy kerek. Suraq-jaýapty epıdemıolog-mamandar sarapqa salady da testten ótýge tıis pasıentterdi irikteıdi.
Ekspress-testtiń alǵashqy legi 50 myń danadan aldymen Nursultan jáne Almaty qalalaryna kelip túsedi. Arnaıy suryptalǵan azamattar tekserilip bolǵannan keıin zerthana testti aqyly negizde júrgize bastaıdy, onyń ýaqyty qosymsha habarlanady.
Aqyly ekspress-testter Qazaqstannyń barlyq qalasynda júrgiziletin bolady. О́ziniń vırýstan saý ekenine medısınalyq jolmen kóz jetkizgisi kelgen adam qalaýy boıynsha aqyly test tapsyryp, tekserile alady.
Qymbat TOQTAMURAT