Almaty qalasynda áleýmettik jaǵdaıy tómen otbasylarǵa kómek kórsetý naýqany qarqyndy jalǵasyp jatyr. Aty jaman indet ásirese qart adamdar úshin qaterli bolǵandyqtan, egde azamattardyń meılinshe úıden shyqpaǵany lázim. Osyǵan oraı Nur Otan partııasy men qala ákimdiginiń ókilderi eriktilermen birlese otyryp, meıirimge muqtaj qart kisilerdiń úılerine azyq-túlik taýarlarymen qatar ystyq tamaq aparyp berdi.
«Biz birgemiz» aksııasyna bilek sybana kirisken eriktiler qıyn sátte qaladaǵy jalǵyzbasty qarııalardyń qas-qabaǵyna qarap, olardyń eshbirin nazardan tys qaldyrmaýǵa tyrysyp baǵýda. Olarǵa arnap aptanyń jeti kúninde ár túrli taǵam daıyndalmaq. Qamkóńil jandardy kúnine bir ýaqyt tamaqtandyrý aksııasyna tanymal óner adamdary men sportshylar da úles qosýda.
«Qarty bar eldiń qazynasy bar. Biz izgilik pen qaıyrymdylyqtyń aınalasynda toptassaq alynbaıtyn qamal joq. Jaratýshy jar bolsa bul qıyn kúnder de artta qalar. Eń bastysy eldigimizdi tanytyp, birligimizdi kórsetýimiz kerek. Muqtaj jandardyń tizimin jasap, qoldan kelgenshe kómek kórsetýge tyrysamyz deıdi», erikti Maqsat Dúısenov.