Elimizdegi tótenshe jaǵdaıǵa baılanysty 2020 jylǵy 6 sáýirden bastap Qazaqstan Respýblıkasynyń orta bilim berý uıymdary qashyqtan oqytý júıesine kóshedi. QR Bilim jáne ǵylym mınıstrligi men QR Aqparat jáne qoǵamdyq damý mınıstrligi birlese otyryp beınesabaqtardy qazaq tilinde «Balapan» telearnasynda kórsetedi. Dúısenbi-juma kúnderi tańǵy saǵat 09:00-den bastap 15:00 aralyǵynda 1-11 synyptyń oqý pánderi boıynsha barlyǵy 2042 beınesabaq ótkizý josparlanǵan.
«Qazaqstan» respýblıkalyq teleradıokorporasııasynyń quramyndaǵy «Balapan» telearnasy «Otau TV» spýtnıktik operatory, «Alma TV» kabeldik operatory, ID TV sıfrlyq teledıdar qyzmeti arqyly qoljetimdi. Sonymen qatar arnany www.balapan.tv resmı saıty men «Qazaqstan.tv» mobıldi qosymshasynan onlaın kórýge bolady. «Android» jáne «iOS» platformalaryna laıyqtalǵan mobıldi qosymshany «App Store»,«Play Market» servısteri arqyly tegin júkteý múmkindigi qarastyrylǵan.
Beınesabaqtardy kópshilikke ońaı qoljetimdi etý maqsatynda «Balapan» telearnasynyń You Tube jelisindegi resmı arnasynan da tikeleı kórsetý josparlanyp otyr.