Gúlshara Ábdiqalyqova Qyzylorda oblysy ákimi qyzmetindegi alǵashqy jumysyn QR DSM taýarlar men kórsetiletin qyzmetterdiń sapasy men qaýipsizdigin baqylaý komıteti Ulttyq saraptama ortalyǵynyń fılıalymen tanysýdan bastady.
Ortalyq qajetti quraldarmen jabdyqtalǵan. Segiz júz dana test qondyrǵysy bar. Eki kún ishinde taǵy qosymsha medısınalyq buıymdar ákelinedi.
Gúlshara Ábdiqalyqova ortalyqtaǵy medısınalyq qural-jabdyq qory jáne adam aǵzasynda qaýipti indetti anyqtaýǵa arnalǵan ádis-tásilderimen tanysa kele, ózekti problemalarǵa da qanyqty. Qazir ortalyqqa zalalsyzdandyrý jumystaryn sapaly júrgizý úshin arnaıy kıimder qajet. О́ńir ákimi jaýapty sala basshylaryna osy baǵytta naqty tapsyrmalar júkteldi.
Osy kúni oblystyq juqpaly aýrýlar aýrýhanasyna barǵan aımaq basshysy emdeý mekemesinde atqarylyp jatqan jumystarmen tanysty.
Oblystyq densaýlyq saqtaý basqarmasynyń basshysy Jaqsylyq Ábdisámetov óńirde koronavırýstyń taralýyn boldyrmaý baǵytynda qolǵa alynǵan sharalar jóninde esep berdi. Aýrýhanada em alyp jatqan naýqastardyń hal-ahýalyn baıandady.
Aýrýhana jumysymen tanysqan Gúlshara Naýshaqyzy emdeý ornyndaǵy tósek oryndardy kóbeıtý jóninde tapsyrma berdi.