Bul týraly Qostanaı oblysynyń ákimi Arhımed Muhambetov koronavırýstyq ınfeksııanyń paıda bolýy men taralýyna jol bermeý jónindegi shtab otyrysynda aıtty.
- Aımaqta medısınalyq maskalar buryn-sońdy arnaıy óndirilmegendikten, biz bul jumysty tigin óndirisimen aınalysatyn jeńil ónerkásip kásiporyndarynda uıymdastyrdyq. Búgingi kúnge deıin oblys boıynsha 70 kásiporyn maska tigip jatyr. Aldaǵy kúnderi buǵan taǵy 20 kásiporyn jumyldyrylady, - dedi oblys ákimi.
17-29 naýryz aralyǵynda oblys boıynsha 238 myń qorǵanysh maskalary tigilgen. A.Muhambetov oblystyń dárihanalyq jeli ıelerine qorǵanys maskalaryn jergilikti óndirýshilerden satyp alýdy usyndy. Sondaı-aq tıisti organdarǵa maskalardy kóterme baǵamen alyp, qymbatqa qaıta saýdalaıtyn alyp-satarlyqqa jol bermeýdi, oblys ákimi qala jáne aýdan ákimderine ózderine qarasty aýmaqtaǵy tigin sehtarynyń óndiris kólemin arttyrýdy, olardyń úzdiksiz jumysyn uıymdastyrýdy qadap tapsyrdy.
Qostanaı oblysy