Koronavırýs ınfeksııasynyń (COVID-19) taralýyna jol bermeı, halyqtyń densaýlyǵyn saqtaý maqsatynda oblystyń bas memlekettik sanıtarlyq dárigeri E.Sydymanovtyń qaýlysy boıynsha, Mańǵystaý oblysynyń aýmaǵynda 2020 jyldyń 3 sáýiri 00:00 saǵatynan bastap 2020 jyldyń 15 sáýiri 07:00 saǵatyna deıin karantın rejımi jáne shekteý sharalary engiziledi. Bul týraly Mańǵystaý oblystyq Kommýnıkasııa ortalyǵy habarlady.
Tártipte 2020 jyldyń 3 sáýiri kúni saǵat 00:00-den bastap 2020 jyldyń 15 sáýiri kúni saǵat 07:00-ge deıin halyqtyń ómir belsendiligin qamtamasyz etýshi avtokólikterdi qospaǵanda, azamattardyń Mańǵystaý oblysynyń aýmaǵyna kirý men shyǵýyna tyıym salynady.
Halyqtyń ómir belsendiligin qamtamasyz etýshi avtokólikterdi (azyq-túlik, dári-dármekterdi tasymaldaıtyn júk jáne jeńil mashınalar, sonymen qosa tótenshe jaǵdaı rejımin qamtamasyz etetin arnaıy jáne qyzmettik kólikter) qospaǵanda, oblys turǵyndaryna qalalar men aýdandar arasyna qatynaýǵa tyıym salynady. Sondaı-aq qoǵamdyq kólikterge tek oryndyqtar sany boıynsha ǵana jolaýshylar kirgiziledi jáne oblys turǵyndarynyń ómir belsendiligin qamtamasyz etýshi medısınalyq, polısııa, avarııalyq-qutqarý jáne ózge de kommýnaldyq shuǵyl qyzmetterdiń (jylý, gazben qamtý, sý jáne energııamen jabdyqtaý) áreketteri shektelmeıdi.
Resmı jáne resmı emes (tirkelmegen) jeke tasymaldaýshylarǵa (avtobýstar, gazelder, taksı) oblystar, aýdandar arasynda jolaýshylar tasymaldaýǵa tyıym salynady jáne barlyq avtovokzaldar men avtobeketterdiń qyzmetteri, teńiz aılaqtarynda azyq-túlik, dári-dármekterdi tasymaldaýdan ózgeleri, jolaýshylar tasymaldaý toqtatylady.
Turǵyn úılerden shyǵýǵa azyq-túlik, dári-dármekterdi, birinshi kezekte qajetti jáne medısınalyq buıymdardy satyp alý, jumysqa barý, medısınalyq kómekke júginý, kúndizgi ýaqytta turatyn jerinen 200 metrden aspaıtyn aralyqta uzaqtyǵy 30 mınýt bolatyn, ózge adamdarmen arada 1 metrden kem bolmaıtyn qashyqtyqty saqtaı otyryp balalarmen serýendeýge jáne kúndizgi ýaqytta úı janýarlaryn uzaqtyǵy 30 mınýt bolatyn ýaqytqa shyǵarýǵa bolady. Sonymen qatar jasy 65-ten asqan turǵyndar erekshe qajettilik bolmaǵan jaǵdaıda óz páterleri men úılerinen kóshege shyqpaýy tıis. Barlyq turǵyndar ózimen birge jeke basyn kýálandyratyn qujattary: jeke kýáligi, júrgizýshi kýáligi, tólqujaty, turýǵa ruqsat beretin yqtııarhaty bolýy tıis.
Azyq-túlik satylmaıtyn saýda ortalyqtarynyń, bólek turǵan azyq-túlik satylmaıtyn dúkenderdiń, avtosalondardyń, avtobólshekter satatyn salondardyń, gúl pavılondarynyń, hımııalyq tazalaý, kir jýý, fotoatelelerdiń, fotosalondardyń, optıkalardyń, lombardtardyń, jyljymaıtyn múlik agenttikteriniń, avtojýý, tehnıkalyq qyzmet kórsetý beketteriniń, saýnalardyń, monshalardyń, fıtnes-klýbtardyń, karaoke, tatý – salondardyń, aýdıo, vıdeo jazatyn stýdııalardyń, uıaly baılanys bólimderiniń, teatrlardyń, kınoteatrlardyń, trenajıor zaldarynyń, sporttyq keshenderdiń, basseınderdiń, sulýlyq salondarynyń, spa-ortalyqtarynyń, tyrnaq stýdııalarynyń, barbershoptardyń, shashtaraz kabınetteriniń, kompıýterlik klýbtardyń, jaılardaǵy balalar oıyn alańdarynyń, baılanysqa túserlik zoobaqtardyń, muz aıdyndarynyń, kórmelerdiń, balalardy damytý ortalyqtarynyń jáne ózge de osy sııaqty qyzmet kórsetý nysandarynyń qyzmeti toqtatylady. Meıramhana, dámhana, barlardyń, ashanalardyń jáne ózge qoǵamdyq tamaqtaný nysandarynyń jumysyna tek «tutynýshylarǵa deıin jetkizý» prınsıpi boıynsha saǵat 07:00-den 22:00-ge deıin jumys isteýge ruqsat etiledi.