Memleket basshysy Qasym-Jomart Toqaev respýblıkalyq telearnalar arqyly sóılegen sózinde astyqty aımaqtardaǵy kóktemgi dán sińirý jumystaryn ýaqytynda júrgizý kerektigin, bul maqsatqa «Agrarlyq nesıe korporasııasy» AQ arqyly 70 mlrd teńge bólinetinin jáne nesıe mólsherlemesi 5%-ten aspaıtynyn aıtqan bolatyn.
Bıylǵy kóktemde Qostanaı oblysyndaǵy bıdaı tuqymyna muqtaj sharýashylyqtar úshin «Keń Dala» baǵdarlamasy boıynsha 17 mlrd teńge qarastyrylyp otyr. Búginge deıin 121 sharýashylyqqa 10,6 mlrd teńge bólinip, jalpy somasy 3,9 mlrd teńgege 104 ótinim maquldanǵan.
Aýyl sharýashylyǵyn qoldaýǵa baǵyttalǵan tıimdi tetiktiń biri – «Qarapaıym zattar ekonomıkasy» baǵdarlamasy. Qostanaı oblysynda búgingi tańda bul baǵdarlama boıynsha 12 mlrd teńge somasyna 39 joba maquldanǵan. Aldaǵy kúnderi qaraýda jatqan 12 jobaǵa taǵy 4,5 mlrd teńge berilmek.
Oblys ákimdiginde ótken jıynda aımaq basshysy Arhımed Muhambetov Prezıdent tapsyrǵan qosymsha nesıe qarajatyn bólýdi júzege asyrý tetigi «Agrarlyq nesıe korporasııasynyń» oblystaǵy fılıalymen birlesip pysyqtalatynyn atap ótti.
- Taıaý kúnderi aýyl sharýashylyǵy qurylymdaryna beriletin nesıe kólemi keńeıtilýi tıis. Bul týraly biz birden aýyl sharýashylyǵy kásiporyndary men sharýa qojalyqtarynyń basshylaryn habardar etemiz, – dedi oblys ákimi.
Shaǵyn jáne orta sharýashylyqtardy birinshi kezekte qoldaý kerektigin basa aıtqan aımaq basshysy: - Qala jáne aýdan ákimderiniń, aýyl sharýashylyǵy jáne jer qatynastary basqarmasynyń nazaryn shaǵyn jáne orta sharýa qojalyqtaryn qoldaý qajettigine aýdaramyn. Bizdiń oblysta mundaı 6 700 sharýashylyq bar, – dedi.
Bıyl oblystaǵy kóktemgi egin jumystaryn júrgizýge 71 myń tonna janarmaı bólingen. Dıqandar úshin belgilengen baǵa lıtrine 177 teńgeden aspaıdy.
Jıyn sońynda aımaq basshysy memlekettik qoldaýdyń óńirdegi ár sharýashylyqqa jetýi asa mańyzdy ekenin eskertti. Memlekettik qoldaý sharalaryn júzege asyrý barysy arnaıy tekserý komıssııasy men prokýratýranyń qyraǵy qadaǵalaýynda bolady.
Qostanaı oblysy