Prezıdent Qasym-Jomart Toqaevtyń tótenshe jaǵdaı kezinde halyqtyń áleýmettik ahýalyn retteýge qatysty úndeýi der kezinde jasaldy. Biz qazir ashyq qoǵamda ómir súrip otyrmyz. Halyq basqa elderde ne bolǵanyn kózimen kórip, qýipti indettiń búkil álemdi jaılap, tipti elimizge de taralyp bara jatqanyn bilip otyr. Sondyqtan qoǵamǵa qazir memleket basshysynyń sheshimi, úkimettiń naqtyly áreketteri mańyzdy.
Men úndeýdi eń aldymen halyqtyń ómiri men densaýlyǵyna degen laıyqty kóńil bólý, mańyzdy qadam dep túsindim. Ekinshiden, úıdegi karantınde jatqan jurttyń jaıyn retteý dep qabyldadym. Buǵan deıin úkimetten jalaqy alyp otyrǵan memlekettik qyzmetkerler ǵana emes, jeke kásipkerlerge de ótemaqy tóleýdi qarastyryp jatyr. Bul kómek eldegi qalypty kezeńde kórsetilmegen, daǵdarys ýaqytynda berilip otyr. Munyń ózi ońaı sharýa emes.
Budan bólek Prezıdent úndeýde bolashaqtaǵy jumystardy da aldyn ala baǵdarlap otyr. Birqatar el osy daǵdarystan shyǵyp keledi, biz de shyǵamyz. Biraq mańyzdysy – daǵdarystan keıingi jumys. Aıtalyq, egistik jumystaryna aıryqsha kóńil bólip, benzın baǵasyn 15 paıyzǵa deıin tómendetti. Bul – dıhandar men sharýalar úshin úlken qoldaý. О́ıtkeni biz kóktemde egindi jaqsylap ekpesek, kúzdiń kúni azyq-túliktiń baǵasy birden sharyqtap shyǵa keledi. Al mundaı jaǵdaı ózi daǵdarystan shyqqan halyqqa odan saıyn soqqy bolmaı ma?
Eldegi osy jaǵdaıǵa baılanysty úndeý aldaǵy ýaqytta taǵy da jarııalanady dep senemin. Sebebi joǵaryda aıtqanymdaı, daǵdarystan keıingi problemalardy sheshýdiń joldary naqty belgilenýi kerek.