1 sáýir kúni Nur-Sultan qalasy ákimdiginiń Memlekettik akademııalyq fılarmonııasynyń Sımfonııalyq orkestri (kórkemdik jetekshisi Berik Batyrhan, dırıjeri Ernar Nurtazın) «Biz birgemiz» aksııasyn qoldap, onlaın rejıminde áıgili kompozıtor, dırıjer, mýzyka synshysy P.I.Chaıkovskııdiń №5 sımfonııasyn, «Aqqýly kólin», jáne «Shelkýnchık» shyǵarmalaryn klassıkalyq mýzykany súısine tyńdaıtyn kórermenderge tartý etti.
Atalmysh týyndylardy sımfonııalyq orkestrdiń mýzykanttary, Halyqaralyq baıqaýlardyń laýreattary Mıras Esmuhan, Saltanat Orynbaeva, Qalqaman Dúısembaev, Álıhan Jıganshın, Ilmıra Ardasheva, Aısha Syrymbaeva, Gúlnaz Joldanova oryndap, áleýmettik jelide kópshiliktiń ystyq yqylasyna bólendi.
Esterińizge sala ketsek, Elorda fılarmonııasynyń sımfonııalyq orkestri mýzyka óneriniń kemeńgeri, uly tulǵa P.I.Chaıkovskıı atyndaǵy Halyqaralyq festıvalin ótkizbek nıette bolatyn. Biraq, jer-jahandaǵy jáne eldegi tótenshe jaǵdaıǵa baılanysty keıinge shegerilgen-tin. Degenmen fılarmonııa ujymy halyqtyń eńsesin kóterý maqsatynda, mundaı izgi isti qolǵa alyp, óziniń daıyndyǵyn taǵy bir pysyqtap aldy.
Iá, adamzat tarıhyndaǵy mýzyka danyshpany, máńgilik murasymen óshpes iz qaldyrǵan klassık P.I.Chaıkovskıı festıvalinde beıbit kúnde jolyǵatynymyzǵa kámil senemiz.