Bul týraly qoǵamdyq kommýnıkasııa ortalyǵynda ótken brıfıngte Eńbek, áleýmettik qorǵaý jáne kóshi-qon komıtetiniń MO boıynsha departament basshysy Arman Eldesov málimdedi.
Tótenshe jaǵdaı rejıminiń qoldanylý kezeńinde Eńbek jáne halyqty áleýmettik qorǵaý mınıstrligi medısınalyq-áleýmettik saraptama bólimine barmaı, «Múgedektikti jáne/nemese eńbek etý qabiletinen aıyrylý dárejesin belgileý jáne/nemese qajetti áleýmettik qorǵaý sharalaryn aıqyndaý» memlekettik qyzmetin syrttaı formatta alý tetigin ázirledi.
Qyzmet «Elektrondyq úkimet» portalynda «Elektrondyq ótinish» servısi arqyly berilgen elektrondyq ótinish negizinde usynylady.
Memlekettik qyzmetti alý úshin azamat qajetti qujattardyń skanerlengen nusqasymen qosa tıisti standartqa sáıkes ótinishti toltyrýy tıis. О́tinishke elektrondyq sıfrlyq qoltańbamen qol qoıý qajet.
Budan ári ótinish kórsetilgen qyzmetti alýshynyń turǵylyqty jeri boıynsha Eńbek, áleýmettik qorǵaý jáne kóshi-qon komıtetiniń aýmaqtyq departamentine jiberiledi.
Medısınalyq-áleýmettik saraptama júrgizilgennen keıin onyń nátıjeleri kórsetiletin qyzmetti alýshyǵa sms-habarlama arqyly, «Elektrondyq úkimet» portalyndaǵy jeke kabınetke nemese «Elektrondyq ótinish» servısi arqyly kelip túsken ótinishke jaýap túrinde jiberiledi.
Aıta ketý kerek, tótenshe jaǵdaı kezeńinde medısınalyq-áleýmettik saraptama bólimine qaıta kýálandyrýǵa kelmegen azamattarǵa ótkizip alǵan kezeńine 2020 jylǵy 16 aqpannan bastap merzim belgilenetin bolady.
Eger qaıta kýálandyrý merzimi tótenshe jaǵdaıdan bir aı buryn (16 aqpanǵa deıin) nemese sol ýaqytta kelgen bolsa (16 naýryzdan keıin), onda merzimder tótenshe jaǵdaı kezinde avtomatty túrde uzartylady.
Búgingi tańda naýryz aıynda 268, sáýir aıynda 672 múgedektik alýshynyń múgedektik merzimderi avtomatty túrde uzartyldy.