Memleket basshysy Qasym-Jomart Toqaev «Áskerı mindettilerdi arnaýly jıyndarǵa shaqyrý týraly» Jarlyqqa qol qoıǵan edi.
Jarlyqta «Qazaqstan Respýblıkasy Qarýly Kúshteriniń aýmaqtyq áskerlerin jasaqtaý úshin áskerı mindettiler arnaýly jıyndarǵa shaqyrylsyn. Astananyń, respýblıkalyq mańyzy bar qalalardyń jáne oblystardyń jergilikti atqarýshy organdary Qazaqstan Respýblıkasy Qarýly Kúshteriniń Bas shtabymen kelisý boıynsha shaqyrylatyn áskerı mindettilerdiń sanyn jáne arnaýly jıyndardy ótkizý merzimderin aıqyndaı otyryp, tıisti jergilikti áskerı basqarý organdary arqyly áskerı mindettilerdi arnaýly jıyndarǵa shaqyrýdy júrgizýdi uıymdastyrsyn jáne qamtamasyz etsin» dep aıqyn kórsetilgen.
Elimizdegi Tótenshe jaǵdaıǵa baılanysty qolǵa alynǵan bul sharany men de qoldaımyn. Sebebi dúnıe júzin dúrliktirgen pandemııany aýyzdyqtaý áli de ońaıǵa soqpaı tur. Bul rette er- azamattyń el aldyndaǵy basty paryzy – Otanyn ot pen sýdan qorǵap, qoldan kelgen kómegin berý dep bilemin.
Árıne arnaýly jıyndarǵa shaqyrylǵandar maıdan shebine jiberilmesi belgili. Sondyqtan «Otan ottan da ystyq» dep dana halqymyz aıtqandaı, ony kesel men kesapattan qorǵaý – keýdesinde namysy bar ár otandasymyzdyń basty azamattyq boryshy. Batyr Baýyrjan Momyshulynyń «Otan úshin otqa tús, kúımeısiń!» degen qanatty sózi osyndaı qysyltaıań shaqta jigitterdiń jigerin janyp, júrektegi uranyna aınalýy tıis. Sebebi nebir zulmat jyldardy, ashtyq pen soǵysty tobyǵynan qan keship júrip eńsergen erjúrek halqymyz budan da zor náýbetterdi basynan ótkergen edi. Oǵan tarıh tarazy.
«Er el úshin týady» degen bar. Osy sózdi baıraq etip kóterer kez keldi. Basymyz aman, baýyrymyz bútin bolsyn desek, Memleket basshysy bastaǵan sharaǵa judyryqtaı jumylýymyz qajet!
Oljas AHMETOV,
«Jas Sarbaz» áskerı-patrıottyq klýbynyń ustazy
Qaraǵandy oblysy