Tótenshe jaǵdaı kezinde juqpaly indettiń aldyn alý men saqtyq sharalarynyń kúsheıýi aýyl-aımaqtaǵy aǵaıynǵa salmaq túsirýde. Ásirese, dári-dármek pen qajetti kerek-jaraqtyń jetkilikti bolýy kún tártibine shyqty. Osy tusta atqarýshy bılikke turǵyndardy medısınalyq maska, basqa da indetten saqtaý qurylǵylarymen qamtýǵa kásipkerler qol ushyn sozdy.
Almaty oblysynda bul iske barlyq deńgeıdegi kásipkerler úles qosyp jatyr. «Biz birgemiz» aksııasy arasynda muqtaj otbasylarǵa tegin azyq-túlik taratý sharasy barlyq aýdandarda, kún saıyn ótkizilýde. Budan bólek qaltaly azamattar óz qarjysyna adam boıyndaǵy dert belgisin jyldam anyqtaıtyn medısınalyq test qurylǵysyn da satyp alyp, tegin taratyp otyr eken. Mysalǵa, bul santta aldymen Alakól aýdanynyń kásipkerlerin aıtýǵa bolady. Aýdandaǵy belsendi iskerdiń biri Nurlan Belgibaev aýdan turǵyndarynyń densaýlyǵyn tekserýge qajetti ekspress test satyp alyp, aýdan ákimdigine syıǵa tartty. Ol bul maqsatqa 1 mln 100 myń teńge jumsapty.
Osyndaı qıyn-qystaý kezeńde qol ushyn sozǵan jomart janǵa aýdan ákimi Álibek Jaqanbaev aýdan turǵyndarynyń qamy úshin jasalǵan kómekke sheksiz rızashylyǵyn bildirip, atalǵan ekspress test qorabyn aýdandyq ortalyq aýrýhanaǵa qoldanysqa tapsyrdy. Jalpy buǵan deıin de kásipker óz qarajysyna dene qyzýyn ólsheýge arnalǵan 30 pırometr apparatyn satyp alyp, ony da aýdandyq aýrýhana bergen bolatyn.
Almaty oblysy