Kókshetaýda Asia Waters kompanııasy antıseptık tapshylyǵy baıqalǵan qazirgi qysyltaıań shaqta osy olqylyqtyń az da bolsa ornyn toltyrýdy qolǵa aldy. Bul týraly «Atameken» UKP baspasóz qyzmeti habarlady.
«ASEPTDEZIN» dep atalatyn antıseptıkterdiń alǵashqy partııasy «Kókshetaý mıneraldy sý» iri óndiris alańynda shyǵaryldy. Bul qorǵanys quralyn Dúnıejúzilik densaýlyq saqtaý uıymynyń usynymdaryna sáıkes «Kentavr» aqtóbelik spırt zaýytynyń mamandary ázirledi. Memlekettik standarttar boıynsha antıseptık Densaýlyq saqtaý mınıstrliginde tirkeý men sertıfıkattaýdan ótti. Atalǵan prosedýra onyń sapasy men qaýipsizdigin rastaıdy.
– Naryqtaǵy antıseptıkke degen suranysty eskere otyryp, qosymsha qarjylyq shyǵyndarǵa qaramastan jańa ónim shyǵarý týraly sheshim birden qabyldandy. Ázirge biz qysqa merzimde tıisti memlekettik organdarda tirkeý men sertıfıkattaýdan ótip, qoljetimdi baǵadaǵy sapaly ári qaýipsiz antıseptık quraldaryn óndirisin jolǵa qoıǵan jalǵyz óndirýshimiz, – dedi Asia Waters kommersııalyq dırektory Rýslan Lamanov:
Antıseptık juqpaly aýrýlardyń aldyn-alý úshin qoldy jýýǵa arnalǵan jáne barlyq sanıtarlyq, sapalyq standarttarǵa sáıkes keledi. О́nimniń quramynda spırt, sýtegi totyǵy jáne terini jumsartatyn komponentter bar.
Bastapqyda 80 myń lıtr antıseptık shyǵaryldy. Onyń mólsherin 15 sáýirge deıin 600 myń lıtrge jetkizý josparlanǵan. Naryqtaǵy suranysqa saı shıkizat jetkilikti bolsa, óndiris qýattylyq budan da joǵary kóterýge qaýqarly.
Asia Waters osyndaı antıseptık óndirisin Qostanaı qalasyndaǵy spırt zaýytynda da qolǵa alyp jatyr. Qazir kompanııa medısınalyq mekemeler men memlekettik uıymdardan tapsyrys qabyldaýda. Jaqyn arada eldegi dúkenderde paıda bolady. Antıseptıktiń 0,5 lıtri – 1730 teńgeden, 1 lıtri – 2640 teńgeden jáne 5 lıtri 11 880 teńgeden satylady.