Nurlan Nyǵmatýlınniń tóraǵalymen ótken Parlament Májilisiniń jalpy otyrysynda «Qazaqstan Respýblıkasyndaǵy saılaý týraly» Konstıtýsııalyq zańyna tolyqtyrýlar engizý týraly» zań jobasy maquldandy.
Atalǵan zań jobasy Prezıdenttiń Ulttyq qoǵamdyq senim keńesiniń ekinshi otyrysynda bergen tapsyrmasyn iske asyrý maqsatynda ázirlendi.
Bul qujatty depýtattardyń nazaryna Ádilet mınıstri Marat Beketaev usyndy. Onyń aıtýynsha, zań jobasynda partııalyq saılaý tizimderinde áıelder men jastar úshin 30% kvotany qarastyrý usynylady. Osy maqsatta Saılaý týraly Konstıtýsııalyq zańda áıelder men jastarǵa arnalǵan kvotalardy partııalyq tizimge engizý týraly talap qoıylady.
– Jalpy, búgingi tańda álemdegi memleketterdiń basym bóligi áıelder men jastardyń saılaý prosesine teń qoljetimdiligine kepildik berý úshin qajetti sharalar qabyldaýda. Partııalyq genderlik kvotalar Eýropa elderinde qoldanylady jáne osyndaı erejeler Germanııa, Norvegııa, Fransııa jáne Belgııada keńinen taralyp, saılaý týraly zań deńgeıinde bekitilgen. Osyǵan oraı halyqaralyq tájirıbe aıasynda usynylyp otyrǵan jańa normalar áıelderdi eldiń qoǵamdyq-saıası prosesterine belsendi tartýǵa múmkindik beredi. Sonymen qatar Memleket basshysy atap ótkendeı, biz jastardyń Parlamentke jáne jergilikti ókiletti organdaryna kelýine yqpal etýge tıispiz. Osy bóliktegi zańnamalyq túzetýler, qoǵamdyq-áleýmettik problemalardy sheshý úshin qabiletti jastardy da saıasatqa belsendi tartýǵa múmkindik beredi, – dedi M.Beketaev.