Májilis depýtaty, Agrarlyq máseleler komıtetiniń tóraǵasy Berik Ospanov Premer-Mınıstr Asqar Mamınge joldaǵan saýalynda kóktemgi dala jumystaryn qarjylandyrý máselesin kóterdi.
– Tótenshe jaǵdaı kezinde Prezıdent pármenimen týyndaǵan máselelerdi sheshý jóninde ýaqtyly sharalar qabyldanyp jatyr. Aýyl turǵyndaryn tolǵandyratyn asa ózekti máseleniń biri – kóktemgi dala jumystaryn qarjylandyrý. AО́K sýbektilerin nesıelendirý «QazAgro» UBH-nyń «Agrarlyq nesıe korporasııasy» AQ jáne «Aýyl sharýashylyǵyn qarjylaı qoldaý qory» AQ arqyly, sondaı-aq ekinshi deńgeıdegi bankterdi jáne kredıttik seriktestikterdi qorlandyrý arqyly júrgiziledi. Shamamen, 170 mlrd teńge bólingenine qaramastan, bul qarajat tolyq kólemde ıgerilmeýde jáne sońǵy qaryz alýshylarǵa, birinshi kezekte aýyl sharýashylyǵy taýar óndirýshilerdiń kepildikteriniń bolmaýy nemese jetispeýi sebebinen jetpeı jatyr, – dedi depýtat.
Berik Ospanovtyń aıtýynsha, qarjylandyrý problemasyn sheshý joldarynyń biri – ónimdi forvardtyq satyp alýdy qoldaný bolýy múmkin. Osy rette ol óńirlik Áleýmettik-kásipkerlik korporasııalardyń múmkindikterin paıdalanýdy qarastyrýdy usyndy. Birinshiden, ÁKK ákimdikterdiń qarjy ınstıtýty retinde qaryz alýshy týraly tolyq aqparattary bar. Ekinshiden, satyp alynatyn ónim eń aldymen jergilikti halyqtyń qajettiligi úshin qajet. Bul tetik turaqtandyrý qorlaryn tolyqtyrýǵa jáne ónimderdi deldalsyz satý máselelerin retteýge múmkindik beredi.
Sondaı-aq májilismen jarma, dándi, maıly daqyldar, kartop jáne kókónis sııaqty birneshe baǵyt boıynsha ónimder satyp alýdy usynyp, ÁKK-ni «QazAgro» AQ arqyly da nemese respýblıkalyq bıýdjetten bólingen bıýdjettik kredıtterdiń bir bóligin jergilikti bıýdjetke qaıta bólý jolymen de qarjylandyrýǵa bolatynyn alǵa tartty.