Qytaılyq dárigerler Qazaqstandaǵy ózderiniń jumystaryn aıaqtap, úılerine oraldy. Medısına qyzmetkerleri tobynyń Qytaıǵa qaıtýyn Qazaqstan Áskerı áýe kúshteri áskerı-transporttyq avıasııa kúshimen júzege asyryldy. Bul týraly Qorǵanys mınıstrliginiń baspasóz qyzmeti habarlady.
10 qytaılyq dárigerlerden quralǵan toptyń 9 sáýirden bastalǵan elimizge kelýi 15 kúnge sozyldy. Osy ýaqyt ishinde qytaılyq mamandar medısınalyq mekemelerge baryp, semınarlar, trenıngter men konferensııalar aıasynda qazaqstandyq áriptesterimen koronavırýstyq ınfeksııany aldyn-alý men COVID-19-ben aýyratyn naýqastardy emdeý, ınfeksııany juqtyrǵan adamdardy anyqtaý algorıtmi men olardy oqshaýlaý, epıdemıologııalyq zertteýler ádisteri, medısınalyq personaldyń dıagnostıkadan ótýi men olardyń ınfeksııany juqtyrýlaryn boldyrmaý týraly tájirıbelerimen bólisken bolatyn.
Atalǵan sharalarda áskerı dárigerler de qatysqan bolatyn. Qazirgi tańda áskerı medısınalyq personal koronavırýspen aýyratyn naýqastardy emdeý jáne qaýipti ınfeksııamen kúrestegi qajetti kómek kórsetýmen aınalysýda.