Togo quramasynda óner kórsetetin tanymal fýtbolshy Emmanýel Adebaıor koronavırýstan zardap shekkenderge qarjylaı kómek kórsetýden bas tartty.
Togo – Afrıkanyń batysynda ornalasqan shaǵyn memleket. Bul elde 7 mıllıonnan sál ǵana asa halyq turady. Lome – Togonyń astanasy. Aıtýly shahardyń 900 myńǵa jeter-jetpes turǵyna bar. Qazirgi kezde koronavırýs Togoǵa da jetken eken. Feısbýktaǵy óz akkaýntynda Adebaıor: «Koronavırýsqa qarsy kúreske aqsha bólýge qulqym joq. Sol úshin de kópshilik meni aıyptap ta jatyr. Biraq eshkimniń pikiri meni qyzyqtyrmaıdy. Olar bilgenderin istesin. Al men óz qalaýym boıynsha ómir súrgim keledi. Sondyqtan da qaıyrymdylyq kórsetýden bas tartamyn» dep málimdedi.
36 jastaǵy Emmanýel Adebaıor kezinde «Monako», «Arsenal», «Manchester Sıtı», «Real», «Tottenhem» jáne basqa áıgili komandalarda óner kórsetken. Bul kúnderi Paragvaıdyń «Olımpııasynda» oınaıdy. Togo quramasy sapynda 82 kezdesý ótkizip, 32 gol soqty.