Mádenıet jáne sport mınıstri Aqtoty Raıymqulova dárigerlerge qoldaý kórsetý maqsatynda júzege asyrylyp jatqan jobalar jaıynda aıtty.
«Mádenıet jáne óner salasynyń qyzmetkerleri belsendi qatysyp jatqan mýzykalyq chellendjder jalǵasýda. Mysaly «Biryńǵaı álem» jobasy Qazaqstan jáne Reseı ártisteriniń qatysýymen túsirilip kórermenderge usynyldy. Sonymen qatar «Turan» folklorlyq-etnografııalyq toby 15 memlekettiń mýzykanttarymen birigip joba jasaýda. Búkil álemde indetpen kúreste dárigerlerge qoldaý kórsetý maqsatynda birneshe jobalar júzege asyrylýda», dedi Aqtoty Raıymqulova.
Osy rette mınıstr Dımash Qudaıbergen men Maıra Muhametqyzynyń dárigerlerge arnap shyǵarǵan ánderin atap ótti.
«Qazaqstandyq belgili ánshi Dımash Qudaıbergen jańa kompozısııasyn dárigerlerge arnady. Sondaı-aq Astana opera teatrynyń jetekshi solısti Maıra Muhametqyzy álem dárigerlerine klassıkalyq án arnap, búkil álemge osy klassıkalyq klıp taralyp ketti», dedi ol.
Sondaı-aq ol áleýmettik jelilerde keńinen taralǵan chellendjderdi sóz etti.
«Sımfonııalyq jáne halyq aspaptar orkestrleri, teatr ujymdary, óner oqý oryndarynyń oqýshylary, sport maıtalmandary «Biz birgemiz», «Birge eńseremiz» atty chellendjderin búginde jalǵastyrýda. Tanymal ártister oryndaǵan ár túrli rolıkter, sonyń ishinde «Karantın» atty yrǵaqty ánniń klıpi de osy kúni tanymaldyqqa ıe bolyp keledi», dedi mınıstr.