Parlament Senatynyń jalpy otyrysynda «Ardagerler týraly» zań jobasy qaraldy.
Eńbek jáne halyqty áleýmettik qorǵaý mınıstri Birjan Nurymbetov Parlament Májilisinde maquldanǵan «Ardagerler týraly» zań jobasyn senatorlardyń nazaryna usynyp, qujat ardagerlerdi áleýmettik qorǵaýǵa baılanysty qoǵamdyq qatynastardy retteıtin zańnamalyq aktilerdi júıeleý, qaıta qaraý jáne ardagerlerdiń jańa sanattaryn qalyptastyrý maqsatynda ázirlengenin atap ótti.
Zań jobasy boıynsha ardagerlerdiń áleýmettik qorǵalatyn 5 sanaty aıqyndaldy. Onyń ishinde bir sanaty eńbek ardagerlerine qatysty boldy. Olarǵa Sosıalıstik Eńbek Erleri, úsh dárejeli Dańq, úsh dárejeli Eńbek Dańqy ordenderiniń ıegerleri, Qazaqstannyń Eńbek Eri ataǵyna ıe bolǵan tulǵalar, 1941 jylǵy 22 maýsymnan 1945 jylǵy 9 mamyr aralyǵynda kemine 6 aı jumys istegen, áskerı qyzmet ótkergen jáne Ekinshi dúnıejúzilik soǵys jyldary tyldaǵy janqııarlyq eńbegimen minsiz áskerı qyzmeti úshin burynǵy KSRO ordenderimen jáne medaldermen marapattalǵan adamdar jatady.
Jańa zańdy talqylaý barysynda Senat depýtaty Sársenbaı Eńsegenov qujattyń keıbir tustaryna qatysty baıandamashyǵa suraq qoıyp, synǵa aldy. Máselen, senator eńbek ardagerleri sanatyna úsh dárejeli Dańq ordeni ıegerleri nelikten engenin surady. О́ıtkeni bul orden soǵysqa qatysqandarǵa berilgen. Buǵan qosa ol qoldanystaǵy zańda Aýǵan soǵysy ardagerlerine birinshi kezekte turǵyn úı alýǵa quqyq berilgenin, al qazirgisinde bul jaǵy qarastyrylmaǵanyn alǵa tartty.
Bul saýaldarǵa jaýap bergen Eńbek jáne halyqty áleýmettik qorǵaý mınıstri Birjan Nurymbetov soǵysqa da qatysqan, eńbekke de aralasqan tulǵalardyń eńbek ardagerleri retinde de jeńildikterge ıe bolatynyn, onyń ústine qazir Qazaqstanda úsh dárejeli Dańq ordeni ıegerleri joq ekenin aıtty. Al sanaty ózgergen Aýǵan ardagerleri úshin burynǵydaı barlyq jeńildik saqtalatynyn atap ótti.