Osydan dál 36 jyl buryn, ıaǵnı 1984 jyldyń 8 mamyrynda KSRO óz sportshylaryn AQSh-tyń Los-Andjeles qalasynda ótetin XXIII jazǵy Olımpııa oıyndaryna jiberýden resmı túrde bas tartqan edi.
1980 jyly AQSh bastaǵan birqatar kapıtalıstik memleket Máskeý Olımpıadasyna boıkot jarııalaǵan bolatyn. Soǵan jaýap retinde KSRO-nyń Olımpıadalyq komıteti Los-Andjelestegi jarysqa qatyspaý jóninde sheshim qabyldady. Máskeý tarapynan qabyldanǵan bul sheshimdi Albanııa, Angola, Afganıstan, Bolgarııa, Vetnam, GDR, Iemen, Kýba, Laos, Majarstan, Mońǵolııa, Polsha, Soltústik Koreıa, Chehoslovakııa, Efıopııa, Joǵarǵy Volta, Iran jáne Lıvııa qoldady.
Olımpııa oıyndarynyń ózine keletin bolsaq, 1984 jyldyń 28 shildesinde bastalǵan dúbirli doda 12 tamyz kúni óz máresine jetti. Oǵan 140 memleketten kelgen 6829 sportshy qatysty. Olar 23 sport túri boıynsha baq synap, 221 júlde jıyntyǵyn sarapqa saldy.
Jalpy komandalyq esepte AQSh quramasy jeke-dara kósh bastady. Jarys qojaıyndary 83 altyn, 61 kúmis jáne 30 qolany oljalady. Ekinshi jáne úshinshi oryndarǵa Rýmynııa (20+16+17) men GFR (17+19+23) taban tiredi.