Memleket basshysynyń qoldaýymen Qazaqstanda sońǵy jeti jylda jol ınfraqurylymyn jańǵyrtýdyń aýqymdy baǵdarlamasy júzege asyrylyp jatyr. Osy kezeńde elimizde respýblıkalyq jáne jergilikti mańyzy bar avtomobıl joldarynyń 25 myń shaqyrymnan astamy salynyp, rekonstrýksııalandy, dep habarlaıdy Egemen.kz.
Qazaqstandaǵy jalpy paıdalanymdaǵy kólik joldary jelisiniń jalpy uzyndyǵy shamamen 96 myń shaqyrymdy quraıdy. Onyń 25 myń shaqyrymy respýblıkalyq mańyzy bar joldarǵa, al 71 myń shaqyrymy jergilikti mańyzy bar joldarǵa tıesili. Iri ınfraqurylymdyq jobalardy iske asyrý jańa kólik dálizderin qalyptastyrýǵa, óńirlerdiń baılanysyn arttyrýǵa jáne jol jelisiniń sapasyn edáýir jaqsartýǵa múmkindik berdi.
Kólik mınıstrliginiń málimetinshe, 2019 jyly jergilikti mańyzy bar avtomobıl joldarynyń normatıvtik jaǵdaıdaǵy úlesi 68 paıyzdy qurasa, búginde bul kórsetkish 91 paıyzǵa jetti. Respýblıkalyq mańyzy bar joldar boıynsha normatıvtik jaǵdaıdaǵy joldardyń úlesi 85 paıyzdan 94 paıyzǵa deıin ósti.
«Negizgi jobalardyń biri – elimizdiń iri qalalary Astana men Almaty arasyndaǵy kólik qatynasyn qamtamasyz etetin «Qaraǵandy – Almaty» avtojolyn rekonstrýksııalaý boldy. Joba aıasynda trassanyń jekelegen ýchaskeleri keńeıtilip, kópirler men jol ótpeleri jańǵyrtylyp, jańa kólik aıryqtary salyndy», dep jazdy mınıstrlik.
Sonymen qatar «Taldyqorǵan – О́skemen» avtojolynda rekonstrýksııa júrgizilip, zamanaýı asfaltbetonjamylǵysy tóselip, jol ınfraqurylymy jańartyldy.
О́tken jyly Qytaımen memlekettik shekaraǵa shyǵýdy qamtamasyz etetin jáne shyǵys baǵytynyń tranzıttik áleýetin kúsheıtetin «Qalbataý – Maıqapshaǵaı» trassasyn rekonstrýksııalaý aıaqtaldy.
Osy jyldar ishinde iske asyrylǵan iri jobalar qatarynda «Qostanaı – Denısovka», «Aqtóbe – Qandyaǵash –Atyraý» avtojoldaryn, sondaı-aq «Astana –Pavlodar», «Aqtaý – Jetibaı», «Merki – Býrylbaıtal», «Atyraý – Astrahan» tasjoldarynyń rekonstrýksııasy da bar. Bul joldar óńiraralyq qatynasty damytýda jáne el ishindegi ekonomıkalyq baılanystardy nyǵaıtýda mańyzdy ról atqarady.
Jekelegen mańyzdy joba retinde «Úsharal – Dostyq» avtomobıl jolyn jańǵyrtýdy ataýǵa bolady. Jobany iske asyrý jol qozǵalysynyń qaýipsizdigin arttyrýǵa jáne Qazaqstan-Qytaı shekarasyndaǵy logıstıkalyq torappen kólik baılanysyn jaqsartýǵa múmkindik berdi.
Qyzylorda oblysynyń aýmaǵynda «Qyzylorda –Jezqazǵan» avtojoly rekonstrýksııalandy. Kóptegen jyldar boıy osy trassanyń jaı-kúıi júrgizýshiler men jolaýshylar tarapynan synǵa ushyrap keldi. Qazirgi ýaqytta joldyń Ulytaý oblysy aýmaǵyndaǵy ýchaskelerin rekonstrýksııalaý jalǵasýda.
«Uzynaǵash – Otar» jobasy aıaqtaldy, sonyń arqasynda Almaty men Shymkent arasyndaǵy kólik dáliziniń negizgi ýchaskeleriniń birinde tórt jolaqty qozǵalys qalyptasty.
Sonymen qatar, Qazaqstandaǵy eń iri Buqtyrma sý qoımasy arqyly ótetin kópir jáne Shaqpaq-Baba asýyndaǵy avtomobıl tonneli paıdalanýǵa berildi.
Sońǵy jyldardaǵy eń iri ınfraqurylymdyq jobalardyń biri – 2023 jyly paıdalanýǵa berilgen Úlken Almaty aınalma avtomobıl joly (ÚAAAJ) boldy. Joldyń kópshilik ýchaskelerinde alty jolaq, al jekelegen bólikterinde tórt jolaqty qozǵalys bar. Joba aıasynda jeti kólik aıryǵy, ondaǵan kópirler men jol ótpeleri salyndy. Bul qurylys memleket pen jeke sektor áriptestigi aıasynda júzege asyrylyp, Ortalyq Azııadaǵy aýqymy jaǵynan eń iri ınfraqurylymdyq jobalardyń qataryna qosyldy. ÚAAAJ tranzıttik qatynasty Almaty qalasynyń syrtyna shyǵarýǵa múmkindik berip, qalanyń kóshe-jol jelisine túsetin júktemeni aıtarlyqtaı tómendetti.
Budan basqa, Memleket basshysynyń bastamasy boıynsha respýblıkalyq mańyzy bar avtomobıl joldaryn ortasha jóndeýdiń aýqymdy baǵdarlamasy iske asyrylyp jatyr. Joba aıasynda jalpy uzyndyǵy shamamen 10 myń shaqyrym jol qamtylmaq. Jumystar eldiń negizgi baǵyttarynda, onyń ishinde «Jezqazǵan – Petropavl», «Qaraǵandy – Qarqaraly», «Qostanaı – Mamlıýtka», sondaı-aq «О́skemen – Semeı» tasjoldarynda júrgizilýde.
Aıyppul arqalap júrmeńiz: Almaty – Astana tasjolynda jańa kameralar iske qosyldy
Bıyl ortasha jóndeýmen shamamen 5 myń shaqyrym joldy qamtý josparlanyp otyr, al jyl sońyna deıin jańartylǵan trassalardyń shamamen 2 myń shaqyrymyn paıdalanýǵa berý kózdelgen.
Infraqurylymdyq jobalardy júzege asyrýdyń arqasynda strategııalyq kólik dálizderi qalyptasyp, jańartyldy. Bul dálizder elimizdiń óńirleri arasyndaǵy jyldam ári qaýipsiz baılanysty ornatady, sondaı-aq Qazaqstannyń halyqaralyq kólik marshrýttarynyń ıntegrasııasyn qamtamasyz etedi. Qazirgi ýaqytta Qazaqstan aýmaǵy arqyly jalpy uzyndyǵy shamamen 13 myń shaqyrym bolatyn segiz halyqaralyq avtomobıl kólik dálizi ótedi.
Kóptegen jyldar boıy qarjylandyrý tapshylyǵy bolǵan jergilikti jol jelisin damytýǵa erekshe nazar aýdarylýda. Iske asyrylyp jatqan jobalar qatarynda «Qaraǵandy – Úshtóbe – Qurylys» joly, Qyzylorda qalasy áýejaıyna kireberis jol, Amangeldi aýylyna kireberis jáne basqa da birqatar nysandar bar.
Prezıdent: 2025 jyly 1500 shaqyrym temir jol salynyp, jóndeýden ótti
Respýblıkalyq jáne jergilikti mańyzy bar joldardy salý jáne jóndeý qazirdiń ózinde aıtarlyqtaı ekonomıkalyq tıimdilik berip otyr. Bıznestiń kóliktik shyǵyndary azaıyp, júk tasymaly jyldamdap, óńiraralyq saýda damyp, shaǵyn jáne orta bıznes ósip, aımaqtardyń ınvestısııalyq áleýeti ósýde. Zamanaýı avtojol jelisi halyqtyń mobıldiligin, ishki naryqtyń damýyn jáne eldiń tranzıttik áleýetin nyǵaıtýdy qamtamasyz ete otyryp, Qazaqstannyń ekonomıkalyq keńistiginiń karkasyna aınalyp keledi.