Aımaqtaǵy mektepke deıingi mekemelerdiń birqatary 13-shi mamyrdan bastap jumysyn bastady.
Oblysta mektepke deıingi 262 uıym bar. Sonymen qatar mektep janynda 353 shaǵyn ortalyq jumys istegen. Tótenshe jaǵdaıdyń aıaqtalýyna baılanysty 13-shi mamyrdan bastap 151 balabaqshada kezekshi toptar óz jumysyn bastady. Degenmen barlyq sanıtarlyq normalar qatań saqtalýy shart.
– Oblystyq bilim basqarmasymen birlesip óńirdegi mektepke deıingi 151 mekemeniń tizimin jasadyq. Ázirshe árbir top boıynsha bala sany 15-ten aspaýy tıis. Sondaı-aq balabaqshaǵa baratyn balalardyń densaýlyǵy týraly anyqtamasy bolýy shart, – deıdi oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim jetekshisi Záýresh Habdýllına.
Balabaqshalarǵa birinshi kezekte ata-analary jumysqa baratyn jáne úıde jalǵyz qala almaıtyn balalar qabyldanady. Medısına qyzmetkeri kúnine eki ret toptardy aralap, balalardyń jaǵdaıyn baqylap otyrady. Al balabaqshaǵa barmaǵan balǵyndardyń orny saqtalady jáne olar normaǵa saı tirkeýde turady.
– Koronavırýs tirkelgen aýdandardaǵy balabaqshalar jumys istemeıdi. Ol Selınograd aýdany túgel, Aqkól, Egindikól jáne Shortandy aýdanyndaǵy Bozaıǵyr aýyly, Arshaly aýdanyndaǵy Arshaly aýylyndaǵy balabaqshalar jumysyn áli bastamaıdy, – deıdi oblystyq bilim basqarmasy basshysynyń orynbasary Botagóz Dúısenova.
Eldegi tótenshe jaǵdaı aıaqtalǵanymen, karantın rejımi jalǵasa beredi. Sol sebepti epıdemıolog mamandar turǵyndardy sanıtarlyq talaptardy qatań saqtaýǵa shaqyrady.