Parlament Senatynyń jalpy otyrysynda «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zań jobasyn ekinshi oqylymda qaraý barysynda alty bapqa baılanysty 16 túzetý engizýdi usyndy.
Beıbit jınalystardy uıymdastyrý jáne ótkizý tártibi týraly zań jobasy jóninde Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń múshesi Sársenbaı Eńsegenov baıandama jasady. Ol Zań jobasynyń beıbit jınalystar ótkizýden bas tartý negizderin aıqyndaıtyn 14 baptyń 1 tarmaǵynyń 10 tarmaqshasyn alyp tastaý usynylatynyn atap ótti.
–Bizdiń oıymyzsha, beıbit jınalystar ótkizý kezinde tirshilikti qamtamasyz etýge baılanysty máseleler arnaıy oryndardy belgilegen kezde qaralyp eskerilýi kerek. Beıbit jınalystardy toqtatý negizderi men tártibi 18 bapta kózdelgen. Osy baptyń 1 tarmaǵynyń 3 tarmaqshasyna sáıkes beıbit jınalystarǵa qatysýshylardyń kúsh qoldaný áreketterin jasaýy, sondaı-aq beıbit jınalystardy uıymdastyrýshynyń beıbit jınalysty uıymdastyrý jáne ótkizý tártibine qatysty osy zańnyń talaptaryn buzýy beıbit jınalysty toqtatýǵa negiz bolady. Bul – qoǵamdyq tártip, densaýlyq saqtaý, basqa adamdardyń ómirin qorǵaýǵa baǵyttalǵan mańyzdy norma. Onyń zańda oryn alýy jón. Degenmen qatysýshy nemese qatysýshylar tarapynan zań buzýshylyq joıylǵan jaǵdaıda beıbit jınalystardy jalǵastyrýǵa múmkindik berý durys degen oıdamyz. Sondyqtan joǵaryda atalǵan normany alyp tastaý jáne 18 bapty jańa 4 tarmaqpen tolyqtyrý usynylady, – dedi Sársenbaı Eńsegenov.