Oblysta koronavırýs ınfeksııasyn juqtyrǵandar sany 147 adamǵa jetti. Indettiń kúrt ósýi turǵyndardyń karantın rejımin saqtamaýy saldarynan deıdi mamandar.
Mamyr aıynyń basynda memleket basshysy Qasym-Jomart Toqaev elimizde tótenshe jaǵdaı aıaqtalǵanyn, alaıda karantın rejıminiń talaptary jalǵasatynyn málimdegen bolatyn. Osydan keıin halyq jaıbaraqat kúıge túsken tárizdi. Qaýlyǵa sáıkes adamdar kóp shoǵyrlanǵan jerlerde, qoǵamdyq oryndarda, qoǵamdy kólikterde maska kıip júrý mindettelgen. Adamdar kóp shoǵyrlanatyn oryn – bazar. Sóre jaǵalaǵan alarman da, saýdagerlerdiń ózderi de karantın talaptaryn saqtaýǵa qulyqsyz. Qoǵamdyq kóliktiń ishine topyrlap kirgen adamdardyń da maska kııýdi qajetsinbeıtini baıqalady.
Qalypty ómirge tolyq kóship, karantındik merzim aıaqtalýy úshin ósim 2 prosentke jetýi tıis. Búginde oblysta indet juqtyrǵandar sany 147-ge jetip, kórsetkish 5 prosentten asqan. Bul – turǵyndar tarapynan týyndaǵan salǵyrttyqtyń saldary bolýy ábden yqtımal.
– Qaýlyǵa sáıkes adamdarǵa dalada júrý úshin ýaqyt shekteýi alynyp tastaldy. Qoǵamdyq kólikter de qalypty júre bastady. Mamyrdyń 25-inen bastap oblys ishindegi jol qatynastary ashyldy. Adamdar kóp shoǵyrlanǵan jerde, keńselerde, qoǵamdyq kólik ishinde júrgizýshi de,jolaýshy da maska kııýi tıis. Jáne bazar, saýda ortalyqtarynda satýshy da, satyp alýshy da maskada bolýy mindetti. Al eger talaptar buzylsa, atalmysh mekeme basshylyǵy jaýap beredi,–deıdi oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Aınagúl Mýsına.
Jaz ýaqytynda adamdardyń úıde otyrýy da qıyn. Soǵan oraı, epıdemıolog mamandar úsh adamnan artyq jınala qalǵan jaǵdaıda maska kııýdi usynady. Aldaǵy ýaqytta jazǵy demalystar bastalyp, turǵyndar jaǵajaıǵa, orman ishine aǵylatyny belgili.