Nur-Sultan qalasyndaǵy Dostyq úıinde «Qazaqstan: tarıhı taǵylym saıasaty» halyqaralyq onlaın konferensııasy ótti. Konferensııa QHA-nyń Saıası qýǵyn-súrgin jáne asharshylyq qurbandaryn eske alý kúnine qatysty «Tarıhtan taǵylym – ótkenge taǵzym» atty jyl saıynǵy halyqaralyq jobasy aıasynda uıymdastyryldy.
Konferensııa barysynda Prezıdent Ákimshiligi Basshysynyń birinshi orynbasary Dáýren Abaev repressııa jyldarynda Keńes Odaǵyndaǵy barlyq halyq zardap shekkenin eske sala kelip, onyń aýyr saldarlaryn sóz etti.
«Biz 31 mamyrda saıası qýǵyn-súrgin jáne asharshylyq qurbandaryn eske alamyz. Qaıǵyly oqıǵany umytpaý – bizdiń azamattyq paryzymyz. 1920-1930 jyldardaǵy jappaı qýǵyn-súrgin, asharshylyq aýyr azap boldy jáne adamdyqqa jatpaıtyn áleýmettik eksperıment nátıjesinde 3 mıllıonnan astam otandasymyz qaza taýyp, jer aýdaryldy. Bul oqıǵa halqymyzdyń janyna jara saldy. Sol úshin Elbasy Nursultan Nazarbaev egemendigimizdiń alǵashy jyldarynan saıası-qýǵyn súrgin qurbandaryn este saqtap, rýhyna taǵzym etýge zor mán bergen. Memleket basshysy Qasym-Jomart Toqaev osy ustanymdy jalǵastyryp keledi», - dedi ol.
Onyń aıtýynsha, 31 mamyr – solaqaı saıasat zardabynan sabaq alýymyz qajettigin taǵy bir eske salatyn kún. «Bul qoldan jasalǵan tragedııa qazaq halqyna orny tolmas qasiret alyp keldi. Tiri qalǵandardyń janyna jazylmas jara saldy. Repressııa jyldary bizdiń el ádiletsiz jaza qoldanatyn túzetý lagerine aınaldy. Sol jyldary jeke tulǵalardyń orynsyz áreketterinen Keńes Odaǵynda ómir súrip jatqan barlyq etnos zardap shekti. Birlik, shydamdylyq jáne danalyqtyń, bir-birin qoldaı bilýdiń arqasynda qatań synaqtyń bárinen óttik», - dedi D.Abaev.
Aıta keteıik, «Tarıhtan taǵylym – ótkenge taǵzym» jobasynyń maqsaty – jalpyulttyq tarıhı sanany qalyptastyrý, «Rýhanı jańǵyrý» baǵdarlamasynyń qundylyqtar qaǵıdatynda qazaqstandyq biregeılik pen birlikti nyǵaıtý. Jobanyń is-sharalary tuńǵysh ret 2010 jyly TMD-ǵa múshe memleketterdiń Gýmanıtarlyq yntymaqtastyǵynyń memleketaralyq qorynyń qoldaýymen elordada jáne «ALJIR» mýzeı-memorıaldyq kesheninde uıymdastyrylǵan. Sodan beri jyl saıyn atalǵan joba aıasynda kóptegen taǵylymdy is-sharalar, túrli formattaǵy jıyndar ótkizilip keledi.