Soltústik Qazaqstan oblysyndaǵy jaman indettiń jaı-kúıi jaıly keshe oblystyq densaýlyq saqtaý basqarmasy bastyǵynyń mindetin atqarýshy Nurlan Aımanov aıtyp berdi.
«Jalpy oblystaǵy jaǵdaı turaqty, ınfeksııanyń taralýy bizdiń baqylaýymyzdyń sheńberinde. Shekten shyqqan kóbeıýlerge jol berilgen joq. Sońǵy úsh aptada anyqtalǵan pandemııanyń bári syrttan kelgen adamdardyń boıynan tabyldy. Bizdiń oblysta M.Jumabaev, Sh.Ýálıhanov jáne Mamlıýt aýdandarynyń aýmaǵynda Reseı Federasııasymen shekaralyq beketter ornatylǵan. Sońǵy ýaqyttarda anyqtalǵan koronovırýstyń bári osy beketterden kirgen adamdardyń boıynan tabyldy», dedi ol óziniń sózinde.
Qazir boıynan derttiń belgisi tabylǵandardyń bári karantındik stasıonarǵa jatqyzylǵan. Al oblys ortalyǵyndaǵy Birinshi aýrýhanada arnaıy uıymdastyrylǵan ınfeksııalyq bólimshede 46 adam emdelýde. Onyń ishinde ekeýiniń boıynan pandemııanyń sıpatyn anyq kórinýde, sonyń ishinde bireýiniń syrqaty onkologııalyq derttiń áserimen kúsheıe túsýde. Qalǵandarynyń jaǵdaıy birqalypty kórinedi. Olardyń temperatýrasy, qan qysymy jáne t.b. kúnine tórt ret tekseriledi.
Sonymen birge, N.Aımanov dárigerler men medısınalyq qyzmetkerlerge qajetti qural-jabdyqtar men dári –dármekterdiń bári jetkilikti ekenin, bul jaǵynan eshqandaı problema joq ekenin atap ótti.
QYZYLJAR