Keles aýdandyq polısııa bólimshesiniń polısııa qyzmetkerleri oblystyq PD Esirtki qylmysyna qarsy kúres basqarmasymen birlesip, zańsyz esirtki ekken kúdiktini quryqtady.
Jasyratyny joq sońǵy kezderi óńirde kóknár, sora ósimdikterin aýlasynda ósirýshiler kóbeıip keledi. О́tken aıda shardaralyq turǵynnyń aýlasynan 62 keli kóknár tárkilengen bolatyn. Kelestik turǵyn ol kórsetkishti eselep otyr. Egde jastaǵy er adam óz aýlasynda quramynda esirtkisi bar ósimdik túpterin kóp mólsherde ósirgen. Keles aýdany turǵynynyń úıin tintý kezinde jedel ýákilder kóknár tárizdes 4730 túp esirtki ósimdigin tárkiledi. Saraptamaǵa sáıkes, quramynda esirtki bar kóknár túpteriniń jalpy salmaǵy 205 keliden asty, al keptirilgen kóknárdiń salmaǵy 12,5 kelige jýyqtady. Atalǵan jaıt Keles APB sotqa deıingi tergep-tekserýdiń biryńǵaı tizilimine QR Qylmystyq kodeksiniń 300-babynyń 2-bóligi (quramynda esirtki zattary bar ósirýge tyıym salynǵan ósimdikterdi zańsyz ósirý) boıynsha tirkelgen. Kúdikti qamaýǵa alyndy.
Qazirgi tańda polısııa qyzmetkerleri sotqa deıingi tergeý amaldaryn júrgizip, kúdiktiniń quramynda esirtkisi bar ósimdikterdi ne sebeppen ósirip, saqtaǵanyn anyqtaýda. Sondaı-aq tártip saqshylary atalǵan baptyń sanksııalary úsh jyldan segiz jylǵa deıingi merzimge bas bostandyǵynan aıyrýdy qarastyratynyn eskertedi.
Túrkistan oblysy