Qazgıdromettiń málimetinshe, maýsymnyń 15-nen 16 qaraǵan túni 22 mm jańbyr jaýdy, aılyq mólsher – 37 mm, - dep habarlaıdy Egemen.kz.
Bul aılyq mólsherdiń jartysynan kóbi. Jaýyn-shashyn sýyn sorǵytýǵa 100-den astam arnaıy kólik jumyldyryldy, olar assenızatorlyq kólikter, motopompalar, sý sorý quraldary. 150 myń tekshe metrden astam sý sorǵytyldy.
Qala kóshelerin sý basýyna jol bermeý úshin ákimdik nóserlik káriz qurlysy boıynsha júıeli jumys júrgizýde.
Mysaly, B.Momyshuly dańǵyly qaladaǵy problemaly ýchaskeniń biri. Atalǵan ýchaskedegi sý basý problemasy bıylǵy jazda sheshimin tabady – kóshede nóserlik kárizdiń magıstraldik kollektorynyń qurylysy júrgizilýde. Atalǵan kárizdiń uzyndyǵy shamamen 500 metr, basy Daýylpaz kóshesinen bastalyp, Elim-aı kóshesine deıin jalǵasady (B.Momyshuly dańǵyly boıynda). Osylaısha aýmaqta jaýyn-shashyn kezinde sý basý máselesi tolyǵymen sheshiledi.
Sondaı-aq "Jastar" shaǵyn aýdanynda (Táshenov jáne Amman kósheleriniń qıylysynda) jetkizýshi kollektorlardy qaıta jańartýǵa baılanysty tazartý qondyrǵylarynyń jumysy júrgizilýde. "Jastar" shaǵyn aýdanyndaǵy jańa qondyrǵylardyń qýaty táýligine 42 myń tekshe metrden asady. Bul jaýyn-shashyn kárizderiniń ótkizý qabiletin edáýir jaqsartady.
Bul tazartý qondyrǵylary Táshenov, Baraev, Ýálıhanov, Imanbaev kósheleri men Respýblıka dańǵylyndaǵy tasqyn sýdyń aldyn alady. О́ıtkeni qurylǵy jerastyn ornatylyp, al ústinde gúlzar salyp, shaǵyn sáýlet músinderi ornatyp, kógaldandyrý jumystaryn júrgizý kózdelgen. Qurylysty 2021 jyly aıaqtaý josparlanyp otyr.
2019 jyly jaýyn-shashyn kárizderi máselesi "Myńjyldyq" alleıasy aýdanyndaǵy eki aýmaqta tolyqtaı sheshilgen edi.