Búginde Taraz qalasyndaǵy turǵyn úılerdiń qasbetine de aıryqsha kóńil bólinýde. Eki myń jyldan astam tarıhy bar kóne shahardyń sáýletin arttyrǵan jobalar legi jalǵasyn tabýda. Qazirgi kezde kópqabatty úılerdiń qasbetterine ál-Farabı, Abaı Qunanbaıuly sııaqty tarıhı tulǵalardyń jáne óńirdegi tarıhı oryndardyń sýretteri salynýda. Bul rette "Turǵyn úı jóndeý – Taraz" jaýapkershiligi shekteýli seriktestigi Taraz qalasyndaǵy Tóle bı, Táýke han, Abaı, Jambyl dańǵyldarynyń boıyndaǵy 35 turǵyn úıdiń syrtyna bezendirý jumystaryn júrgizýde, - dep jazady Egemen.kz
Atalǵan mekeme basshysy Samat Myrzalıevtiń aıtýynsha, búginde qaladaǵy 18 úıdiń árleý jumystary aıaqtalǵan. Onyń aıtýynsha, joba tolyǵymen oblys ortalyǵyndaǵy turǵyn úılerdi jańǵyrtý jumystaryna jaýapty merdiger kompanııalardyń demeýshiligimen júzege asýda.
Tarazdyq turǵyndardy tańdandyryp otyrǵan sýretterdi T.Júrgenov atyndaǵy Qazaq Ulttyq О́ner akademııasynyń túlegi Aıtan Elebaev salý ústinde eken. Ol kóne Taraz shaharyndaǵy úılerdiń syrtyna mýral salý boıynsha konkýrsqa qatysyp, jeńimpaz atanǵan. Osylaısha, Tarazdaǵy "Astana" yqshamaýdanyndaǵy 4 turǵyn úıdiń qasbetine Nur-Sultan qalasyndaǵy sáýletti nysandardyń beınesin beıneleýge tapsyrys alǵan.
Qazirgi kezde ol atalǵan baǵyt boıynsha jumysyn jalǵastyrýda. Jas sýretshiniń týyndylary búginde tarazdyqtardyń kóńilinen shyǵyp otyr. Kún ótken saıyn tarıhı shahardyń sáýleti artýda. Uly tulǵalar ulyqtalyp, tarıhı oryndar kópshilikke keńinen tanystyrylýda.
Jambyl oblysy