Eýropalyq odaqtyń Syrtqy ister jáne qaýipsizdik saıasaty jónindegi Joǵarǵy ókili Orta Azııa elderiniń syrtqy ister mınıstrlerimen vıdeokonferensııa ótkizdi, - dep habarlaıdy Egemen.kz.
Eýropalyq odaqtyń Syrtqy ister jáne qaýipsizdik saıasaty jónindegi Joǵarǵy ókili, Eýropalyq Komıssııanyń vıse-prezıdenti Jozep Borrell júrgizgen kelissózge Qazaqstan, Qyrǵyzstan, Tájikstan, Túrikmenstan men О́zbekstannyń syrtqy saıası vedomstvolarynyń basshylary qatysty. Taraptar Eýroodaqtyń Orta Azııa boıynsha strategııasynyń júzege asyrylýy, koronavırýs pandemııasynyń saldary men Orta Azııadaǵy, onyń ishinde Aýǵanstanmen óńirlik yntymaqtastyq sekildi birqatar ózekti másele boıynsha pikir almasty.
Jozep Borrell pandemııamen kúreste Eýroodaqtyń aımaqqa kórsetken qoldaýyna toqtaldy. Atap aıtqanda, álem úshin qıyn sátte EO Orta Azııa elderiniń densaýlyq saqtaý salasyna jáne áleýmettik-ekonomıkalyq jaǵdaıynyń turaqtalýyna qatysty 123 mıllıon eýro mólsherinde qarajat bólgen. Al Eýropalyq ınvestısııa banki men Eýropalyq qaıta qurý jáne damý banki aımaqta koronavırýs saldarymen kúreske qomaqty nesıe bergen.
Daǵdarys kezinde Orta Azııa elderiniń ózara yntymaqtastyǵy joǵary baǵalandy. Eýropalyq odaqtyń Joǵarǵy ókili pandemııa sekildi ǵalamdyq daǵdarys kezinde kópjaqty yntymaqtastyq pen jahandyq seriktestikke den qoıýdy basty sheshimderdiń biri dep atady.
J. Borrell Eýroodaqtyń bir jyl buryn qabyldaǵan Orta Azııa boıynsha strategııasyna sáıkes aımaqtaǵy eldermen yntymaqtastyqty odan ári damytýǵa nıetti ekenin jetkizdi. Aldaǵy basty máselelerdiń biri – pandemııa saldaryn barynsha joıyp, zardap shekken salalardy qalpyna keltirý. EO odan bólek Azııa men Eýropa arasyndaǵy turaqty ózara baılanysty damytý, shekaralardy basqarý, adam quqyǵy jáne azamattyq erkindik, qaýipsizdik, terrorızm men ekstremızmge qarsy kúres, sý resýrstaryn basqarý jáne qorshaǵan ortany qorǵaý salalarynda Orta Azııa elderimen baılanysty odan ári arttyrýdy kózdep otyr.
Qatysýshylar óńirlik yntymaqtastyqty jandandyrý boıynsha birlesken qadamdardy 2020 jyldyń sońyna deıin Brıýsselde josparlanǵan Saıasat jáne qaýipsizdik máseleleri boıynsha joǵary deńgeıdegi dıalog pen "Eýropalyq odaq – Orta Azııa" syrtqy ister mınıstrleriniń 16-shy konferensııasynda jalǵastyrýǵa ýaǵdalasty.