Túrkistan oblysynda tumaýdyń belgilerimen dárigerlik kómekke jıi júginetinder qatary kóbeıgen. Medısınalyq tekserý nátıjesinde naýqastardan pnevmonııa, ıaǵnı ókpeniń qabynýy anyqtalýda, - dep habarlaıdy Egemen.k.
Qazirgi tańda oblys boıynsha provızorlyq aýrýhanalarda 958 naýqas pnevmonııadan em qabyldaýda. Onyń ishinde, Túrkistan qalalyq aýrýhanasynda - 50, Kentaýda 180 adam emdelýde. Pnevmonııadan 198 naýqas jazylyp shyqsa, 1 maýsymnan beri oblys kóleminde 23 adam atalǵan dertten kóz jumdy.
О́ńirlik kommýnıkasııalar qyzmetinde ótken brıfıngte osyndaı derekter keltirgen oblystyq Qoǵamdyq densaýlyq basqarmasynyń basshysy Marat Pashımov teris kórsetkish halyqtyń beıqamdyǵynan kóterilip otyrǵanyn jasyrmady. Basqarma basshysynyń aıtýynsha, áleýmettik jelilerdegi aýrýhanalarda oryn jetispeýshiligi týraly aqparat shyndyqqa janaspaıdy. "Qazirgi tańda oblys kóleminde dári-dármek qory men ottegi oryndary jetkilikti. Indetke qajetti antıbıotıkterdi aldyrýdamyz. Sondaı-aq, aýrýhanalarda tósek-oryndar boıynsha tapshylyq joq. Qosymsha oryndar ázirlengen. Máselen, Kentaý qalalyq ortalyq aýrýhanasynda 50 oryndyq somatıkalyq bólimshe qaıta beıimdelip, qosymsha 200 oryndyq tósek-oryn, 16 ottegi oryndary daıyndaldy. Al Túrkistan qalalyq ortalyq aýrýhanasynda qosymsha 270 tósek-oryn ázirlengen. Oryn alǵan jaǵdaıǵa baılanysty Túrkistan jáne Kentaý qalalarynda naýqastardy josparly jatqyzý toqtatylǵan. HQTÝ, "Akmaral", "Klınıka Talǵat" syndy jeke klınıkalar da ózderine bekitilgen turǵyndarǵa tıisti medısınalyq qyzmet kórsetýde", dedi Marat Orynbasaruly.
Al Túrkistan qalalyq ortalyq aýrýhanasynyń bas dárigeri Janbolat Dildábekov oblys ortalyǵynda ekpe bólmeleriniń tapshylyǵyna baılanysty qosymsha oryndar daıarlanǵanyn,tósek-oryn sany artyp, naýqastarǵa qajetti dári-dármekter qosymsha alynyp jatqandyǵyn jetkizdi.