Tótenshe jaǵdaıdyń alǵashqy kezeńinde karantındik shekteý sharalary Qyzyljarda tıimdiligin kórsetip, naýqasqa shaldyqqandar sany qyryqtan tómendep aıaqtalǵan edi. Al qazir ol órlep tur. Kúnine 30 ben 50-diń arasynda dertke ushyraǵandar shyǵyp jatyr. Ony alǵashqy karantındik sharalar aıaqtalǵan kezde shekaranyń ashylýymen Reseıden kelgen jerlesterimiz ákelgen bolsa qazir respýblıkanyń ishindegi qozǵalystardyń nátıjesinde de kóbeıip jatyr. Aýrýdyń taralý oshaqtary halyq kóp jınalatyn jerlerden tabylýda, dep jazady Egemen.kz
Qazirgi kezeńniń taǵy bir ereksheligi sol – ol aýdan ortalyqtary men aýyldyq jerlerde de órship tur. Alǵashqy kezeńde mundaı jaǵdaı múlde baıqalmaǵan edi. Sonyń kesirinen Aıyrtaý, Aqjar, Sh.Ýálıhanov, Ǵ.Músirepov jáne Taıynsha aýdandary tolyǵymen karantınge jabylyp, blok-beketter qoıyldy. Shal aqyn aýdanyndaǵy Jańajol men M.Jumabaev aýdanyndaǵy Taman aýyldary da karantınge jabyldy. Qazir oblystaǵy naýqasqa ushyraǵandar sany 700-den asyp ketti jáne bul san toqtaýsyz ósýde.
Keshe Soltústik Qazaqstan oblysynyń taýarlar men qyzmetterdiń qaýipsizdigi men sapasyn baqylaý departamentiniń bastyǵy nemese qysqa sózben aıtqanda bas sanıtarlyq dáriger Serikbaı Qasmaqasov pen Petropavl qalasy ákiminiń orynbasary Asqar Habıbýlın jýrnalısterge suhbat berip, oblys pen qaladaǵy jaman indetke qarsy kúrestiń ahýaly týraly baıandady. S.Qasmaqasov aldymyzdaǵy demalys kúnderi qaladaǵy barlyq sýper jáne gıpermarketter jabylatynyn eskertti.
"Halyqtyń tek jumys pen dárihanaǵa jáne úıiniń mańyndaǵy azyq-túlik dúkenderine ǵana barýyna ruqsat etiledi. Barlyq saýda oıyn-saýyq oryndary, dinı mekemeler, demalys parkteri, jaǵajaılar, bıznes ortalyqtary, bazarlar, qoǵamdyq monshalar men saýnalar jabylady, qoǵamdyq kóliktiń júrýi toqtatylady. Páter ıeleri kooperatıvteriniń basshylaryna osy kúnderi aýlalardy, balalar oınaıtyn alańdardy, avtoturaqtardy dızenfeksııalaý usynylady", dedi ol. Sonymen birge adamdardyń bir-birinen alys bolýy, qoldaryn únemi jýyp otyrýy, ystyqtaryn jıi ólshep turýy suralatynyn jetkizdi. "Tek qana osy shekteýlerdi qatty saqtaǵanda ǵana biz dertti quryqtaı alatyn bolamyz. Sondyqtan bizdiń talaptarymyzǵa túsinistikpen qarańyzdar", dedi S.Qasmaqasov.
Qala ákiminiń orynbasary Asqar Habıbýlın osy talaptardy oryndamaǵan zańdy tulǵalar men jeke tulǵalarǵa aıyppul salynatynyn jetkizdi. Qazirdiń ózinde 16 materıal jınalyp, is sotqa ótkizýge daıyndalýda dedi ol.
"Jattyǵý zaldaryna jasyrynyp barǵysy keletin adamdarǵa, otbasylyq sharalardy esikterin jaýyp alyp ótkizgisi keletin dámhanalar men meıramhanalarǵa da aıyppul salynatynyn eskertemin. Qazirdiń ózinde 4 meıramhananyń jumysy toqtatylyp, lısenzııasyn qaıtaryp aldyq. Osynyń bári halyqtyń densaýlyǵyn saqtaý úshin jasalyp jatqan qatań sharalar, sondyqtan ondaılarǵa turǵyndar túsinistikpen qaraýlary kerek", dedi A.Habıbýlın.
Sonymen birge dertti taratý oshaqtary HQKO men balabaqshalardan shyqqany da belgili bolǵan. Sondyqtan HQKO onlaın rejimde jumys isteýge kóshirilgen. Qalanyń tórt balabaqshasy karantınge jabylǵan. Bir dúken, bir sulýlyq salonyna aıyppuldar salynǵan.
Shynyn aıtý kerek, qyzyl pále bastalǵannan beri Qyzyljarda mundaı dúrbeleń bolǵan joq edi. Endi oblys turǵyndary ony da kórdi, áıteýir arty durys bolyp, indettiń beti qaıyrylsa bolǵany.