Memleket basshysy Qasym-Jomart Toqaev "Egemen Qazaqstan" gazetinde jaryq kórgen "Tarıhı tulǵa taǵylymy" atty maqalasynda N.Nazarbaevtyń TMD qurý týraly usynysyn joǵary baǵalady.
"Nursultan Nazarbaev kánigi saıasatker retinde alyp eldiń keteýi ketip, shańyraǵy shaıqalyp turǵanyn jaqsy sezindi. Sondyqtan da sol syndarly shaqta Odaq basshylary ortasynda júrip jatqan oıynnan tys bolyp, ıntegrasııalyq úrdisterdiń jaqtaýshysy retinde kórindi. Bul ustanymy qaharly eldiń qabyrǵasy sógilgen kezde TMD uıymyn qurýǵa negiz boldy. Jańa memleketterdiń qurylýyna baılanysty "ıýgoslavııalyq ssenarııdiń" bolǵanyn eskersek, bul shyn máninde yqtımal qantógistiń aldyn alǵan sarabdal sheshim bolatyn.
Táýelsizdik alǵan Qazaqstannyń aldynda taǵdyrsheshti tańdaý turdy. Jas memleket álemdik geosaıasattaǵy ornyn anyqtap alýǵa tıis edi. Bul týraly Elbasy bylaı dep eske alady: "Qazaqstan qandaı el bolady? Azııa men Eýropanyń arasyna kópir bola ma? Nemese "Soltústik – Ońtústik" osine aınala ma?", dedi Q.Toqaev.
Memleket basshysynyń aıtýynsha, N.Nazarbaev júrgizgen qaıta qurýlardyń mańyzy men tarıhı aýqymyn túsiný úshin sol kezdegi eldiń ahýalyn kóz aldyna elestetip kórý jetkilikti.
"Keńestik qoǵamnan táýelsiz Qazaq eline turalaǵan ekonomıka, toqtaǵan kásiporyndar men aýyl sharýashylyǵy, kedeıshilik, jumyssyzdyq máseleleri "muraǵa" qalǵan-dy. Munyń bári áleýmettik qysymdy kúsheıte tústi, kez kelgen ýaqytta el ishinde turaqsyzdyq beleń alýy ábden múmkin bolatyn. Sondaı-aq sol kezdegi kóptegen saıasatkerler men sarapshylar elimizdiń bolashaǵyna úlken kúmánmen qaraǵany da shyndyq. Olardyń paıymynsha, Qazaqstandaǵy ekonomıkalyq, demografııalyq qıyndyqtar men shekaranyń zańdy túrde bekitilmeýi eldiń shynaıy táýelsizdigine nuqsan keltiredi-mis. Alaıda, tuńǵysh Prezıdenttiń parasatpen júrgizgen pármendi saıasaty álgindeı senimsizdik tanytqan tujyrymdardyń tas-talqanyn shyǵardy. Bir ǵana shekara beldeýin shegendep berýdiń ózi qanshama qajyr-qaıratty qajet etti deseńizshi", dedi Prezıdent.