Prezıdent Qasym-Jomart Toqaevtyń tapsyrmasy boıynsha Memlekettik komıssııa qabyldaǵan Qazaqstan Respýblıkasynda karantın sharalaryn kúsheıtý týraly sheshim koronavırýstyń taralýynan týyndaǵan qıyndyqtarǵa baılanysty bolyp otyr. Qazirgi tańda Qazaqstanda ǵana emes, álemdik qoǵamdastyqta jaǵdaı kúrdelenip barady.
Dúnıe júzi boıynsha seksennen astam memlekettiń 10 mıllıonnan astam azamaty qaýipti indetke shaldyqty. Prezıdent Q.Toqaevtyń karantın sharalaryn kúsheıtý týraly tapsyrma bergeni – halyqtyń densaýlyǵy men ómirine, eldegi áleýmettik ahýalǵa alańdaýdyń, el azamattaryna degen qamqorlyqtyń kórinisi.
Jasyratyny joq, tótenshe jaǵdaı jarııalanǵan tusta qatań tártip saqtaǵan halyq keıinirek karantın rejimi jeńildetilgen kezde azdap beı-jaı qaraı bastady. Karantınniń keıbir talaptary oryndalmaı jatqany baıqaldy. Sol sebepti Memleket basshysy osyndaı sheshim qabyldaýǵa májbúr boldy.
Biraz ómir kórgen, tarıhtan habary bar adam retinde aıtaıyn, bul Ekinshi dúnıejúzilik soǵystan keıin bolyp otyrǵan asa úlken synaq. Mundaı synaq kezinde halyq jumylyp judyryq bolyp, aýyzbirliktiń, tózim men tártiptiń úlgisin kórsetýi kerek. Ár azamat óziniń jáne aınalasyndaǵy týystary men dostarynyń, tanystarynyń ómiri men densaýlyǵyna jaýapkershilikpen qaraýǵa tıis.
Qazaqstanda qabyldanyp jatqan karantın sharalary basqa amaldyń joqtyǵynan, májbúrli túrde qolǵa alynýda. Oǵan túsinistikpen qarap, erekshe jaýapkershilik tanytýymyz kerek.
Indetke qarsy kúreste dárigerlerdiń biliktiligi men eńbegine, halyqty dári-dármekpen qamtý barysyna kóp nárse baılanysty. Degenmen negizgi jaýapkershilikti ár azamat óz qolyna alǵany jón. Ol úshin barynsha oqshaýlanyp, áleýmettik qashyqtyqty saqtap, densaýlyǵymyzǵa kútimmen qaraýdy jalǵastyrý qajet. Sol arqyly biz bir-birimizge jáne elimizge kómektesemiz. Qazaqstandyqtarǵa jigerin janyp, tulǵalyq jaýapkershiligin kúsheıtip, Memleket basshysynyń sheshimin qoldaıtyn ýaqyt keldi.
Anatolıı BAShMAKOV,
L.N.Gýmılev atyndaǵy EUÝ Qazaqstan halqy Assambleıasy kafedrasynyń meńgerýshisi