Á.Qasteev atyndaǵy Memlekettik óner mýzeıinde «Aınasyz avtoportret» dep atalatyn vırtýaldy kórme ashyldy. Mýzeıdiń «Tengrı Ýmaı» zamanaýı óner galereıasymen birlesken kezekti jobasy belgili sýretshi Rýstam Halfınniń shyǵarmashylyǵyn qamtyǵan. Ekspozısııada qylqalam sheberiniń 1980-2008 jyldardaǵy shyǵarmashylyq ómirbaıanynyń ártúrli kezeńderimen tanysýǵa bolady.
Halfın – naǵyz ónerde eshqandaı shekara bolmaıdy dep paıymdaǵan sýretshi. Ol elimizdegi jańa beıneleý tilderi men tásilderin meńgerýde alǵashqylardyń biri bolyp, óziniń aınalasynda alǵyr zııatkerlik orta qalyptastyrdy. 1980-shi jyldardyń ortasynda jubaıy, sýretshi Lıdııa Blınovamen birge páterlik kórmeler uıymdastyryp, zamanaýı sýret óneriniń óris jaıýyna da súbeli úles qosty.
– Onyń stılinde tús pen fon, abstraksııa men beınelilik arasyndaǵy shekara joıylady. Orys avangardynyń sońǵy ókilderiniń biri Vladımır Sterlıgovpen, keıinirek onyń izbasarlarymen baılanys Halfınniń shyǵarmashylyq dúnıetanymynyń kókjıegin keńeıtti. Ol aldymen keskindemeniń kórkem kórinis tabýy úshin sáýlet ónerin zerttep, al keıin ózin kókeıkesti ónerdiń ókili retinde jarııalady. HH ǵasyrdyń kórnekti fılosoftarynyń shyǵarmalaryn zertteýmen áýestendi. Atap aıtqanda, fransýz postmodernızm fılosoftarynyń eńbekteri ony óz denesin zertteýge ıtermeledi. Keskindemedegi zertteý jumysy Halfındi aldyńǵy dáýirlerdegi keskindeme salasyndaǵy úlken jetistikterdi túsinýge tartty. Onyń eńbekterinde Matıss, Sezann, Malevıch, Velaskestiń shyǵarmalaryna siltemeler bar, deıdi ónertanýshy Ekaterına Reznıkova.
Kórmedegi «Aınasyz avtoportret» toptamasyna biriktirilgen kórinistik adam músinderi bir qaraǵanda túsiniksizdeý kórinedi. Sala mamandarynyń sózinshe, bul týyndylardyń da ózindik fılosofııasy bar. Ondaǵy syzyqtardyń keskini qol men jambastyń ıilisin, aınaladaǵy álemniń erigish formalarymen «kóz keskinin» bildiredi. Zattar men qubylystardyń jasyryn mánin túsinýge umtylý, bolmys zańdylyqtaryn ıntýıtıvti bilý, sýretshiniń ózi onyń bir bóligi bolyp tabylatyn ǵalamnyń kórkem modelin izdeýge jeteleıdi.
Sopaq-kúmbezdi júıeniń áserinen jasalǵan keskindeme – taza eksperıment, onda peızaj keńistigi nysan-ortany, keńistik pen tústi baqylaýǵa arnalǵan óriske aýysady. Munda zattar óz tyǵyzdyǵyn joǵaltady, salmaqsyzdyqqa ıe bolady. Qalyptasqan jolmen júrýdi jetkiliksiz dep sanaǵan sheber Malevıch pen Sterlıgovtyń ıdeıalaryn damyta túsken.
Kórmede «Sýretshiniń terisi» jobasynyń birneshe ınstallıasııasy usynylǵan. Halfın men onyń seriktesteri túrli materıaldardan jasaǵan artefaktiler toptamasy jyl saıyn ońyp ketetin bolǵan. Kórkem emes materıaldar qoldanylǵan beıneli týyndylardyń avtorlyq ınterpretasııasy shynaıy vızýaldi pikirler týdyrady.
ALMATY