Qalalyq prokýratýra, polısııa, memlekettik kirister, ekonomıkalyq tergeý, farmasevtıkalyq baqylaý qyzmetkerlerinen turatyn mobıldi top kún saıyn dári-dármektermen alypsatarlyq faktileriniń jolyn kesý úshin jumys isteýde, dep habarlaıdy Nur-Sultan ákimdiginiń baspasóz qyzmeti.
Atap aıtqanda, I-teka qosymshasyn qoldana otyryp, áleýmettik jelilerdegi (Instagram, Facebook, Telegram, WhatsApp) habarlamalardy zerdeleý arqyly baǵalar únemi qadaǵalanady. 17 shildedegi jaǵdaı boıynsha 30 dárihana dári-dármekterdi, sonymen qatar Qazaqstanda tirkelmegen dári-dármekterdi qymbat baǵamen satatyny anyqtaldy.
Qaralǵan materıaldar negizinde 11 dárihana ıesi farmasevtıkalyq qyzmet erejelerin jáne dári-dármekter men medısınalyq maqsattaǵy buıymdardyń aınalymyn buzǵany úshin jaýapqa tartyldy.
Olardyń árqaısysyna 180 570 teńge aıyppul salyndy. Atap aıtqanda, "Laım Farm" JK, "Asılbaeva D.A" JK, "Ansar-Farm" JShS, "Medi Lab Smartpharma" JShS, "Baıazıtova J.K" JK, "Abdılbaeva A.T" JK, "Mamaeva A.K" JK, "Sýleımenova A.J" JK, "Bazıkova ı IýK" JShS, "Farm-Bıznes Astana" JShS, "Bermahanova K. Sh" JK jaýapkershilikke tartyldy.
"Eger zań buzýshylyq bir jyl ishinde qaıtalansa, farmasevtıkalyq qyzmetpen aınalysý lısenzııasynyń qoldanysyn bir aıdan alty aıǵa deıin toqtata turý túrinde jaýapkershilik qaralady", – delingen Nur-Sultan qalalyq prokýratýrasynyń habarlamasynda.
19 dárihana úshin materıaldar ýákiletti organmen jınaqtalyp zerttelýde. Qazaqstanda tirkelmegen dári-dármekterdi satý faktileri boıynsha eki quqyq buzýshyǵa qatysty materıaldar sot qaraýynda.