Fýtboldan Reseı Premer-lıgasynda óner kórsetip júrgen jerlesimiz Baqtıer Zaınýtdınov óziniń tórtinshi golyn ataqty «Zenıt» klýbynyń qaqpasyna soqty.
Reseı chempıonatynyń sońǵy týrynda «Rostov» óz alańynda Sankt-Peterbýrgtiń klýbyn qabyldady. Kezdesýdiń 18-mınýtynda Baqtıer 22-23 metrdeı qashyqtyqtan qaqpaǵa qaraı dopty shirene tepti. Qaqpashy qansha jantalasqanymen, qaýiptiń betin qaıtara almady. Odan keıin de Qazaqstan ulttyq quramasynyń oıynshysy óte saýatty oınap, stadıonǵa jınalǵan barsha kórermendi qýantty. Biraq ekinshi taımyń 72-mınýtynda Emılıano Rıgonı men 75-mınýtta Serdar Azmýnnyń soqqan golynyń arqasynda «Zenıt» 2:1 esebimen jeńiske jetti.
Osylaısha Reseı birinshiliginde «Zenıt» 73 upaımen chempıon atansa, «Rostov» 45 upaımen 5-orynǵa jaıǵasty. Osy nátıjesiniń arqasynda «Rostov» aldaǵy maýsymda Eýropa lıgasynda oınaýǵa múmkindik aldy. Eske sala keteıik, Zaınýtdınov buǵan deıin «Spartak» komandasynyń qaqpasyna eki gol, «Dınamo» klýbyna bir gol soqqan bolatyn.