Bıyl qyzylordalyq 160 pedagog "kásipkerlik jáne bıznes negizderi" páni boıynsha oqý kýrsynan ótedi. Bul týraly Kásipkerler palatasynyń bólim bastyǵy Janna Sqakova aıtty, - dep habarlaıdy Egemen.kz
Alǵashqy lek 13-24 shilde aralyǵynda onlaın formatta uıymdastyryldy. Oqý kýrsyn tájirıbeli bıznes-trenerler ótkizedi, sondaı-aq tyńdaýshylarǵa "Atameken" UKP jobalyq toby osy jyldyń sońyna deıin aqparattyq-ádistemelik qoldaý kórsetedi.
Oqý kýrsy aıaqtalǵan soń tyńdaýshylarǵa sertıfıkattar tabystalady. Muǵalimder baǵdarlamada usynylǵan materıaldardy tájirıbede qoldanyp, mektep oqýshylaryna bıznes-paıymdaý, bıznesti júrgizý daǵdylaryn úıretedi.
Birinshi lek 63 muǵalimdi qamtysa, 3-14 tamyz aralyǵynda ótetin ekinshi lek oqýyna 60 pedagog qatysady. 17-28 tamyz aralyǵyndaǵy úshinshi lekke 37 adam qatysady dep josparlanýda.
Osyǵan deıin 15-26 maýsymda aımaqtaǵy kolledjderdiń 19 oqytýshysy da osy pán boıynsha biliktilikterin arttyrǵan. Sertıfıkattaryn alǵan oqytýshylar qyrkúıek aıynan bastap sabaq berýge daıyn.