Elbasy kórnekti memleket jáne qoǵam qaıratkeri, akademık Kenjeǵalı Saǵadıevtiń qaıtys bolýyna baılanysty týǵan-týystary men jaqyndaryna kóńil aıtý jedelhatyn joldady, dep habarlaıdy Elbasy.kz.
Nursultan Nazarbaev K.Saǵadıevtiń uzaq jyl túrli jaýapty qyzmetterdi atqaryp, úlken ekonomıst ǵalym retinde óziniń bar bilimi men uıymdastyrýshylyq mol tájirıbesin Otanymyzdy órkendetýge, táýelsizdigimizdi tuǵyrly etýge arnaǵanyn atap ótti.
"Kenjeǵalı Ábenuly abyroıly qyzmeti men boıyndaǵy azamattyq asyl qasıetteriniń arqasynda halqymyzdyń laıyqty qurmeti men qoshemetine bólendi. Halqymyz onyń esimi men eńbegin umytpaıdy dep senemin", - delingen jedelhatta.
Aıta keteıik, keshe akademık Kenjeǵalı Saǵadıev 82 jasynda dúnıeden ótken edi.