Ortalyq kommýnıkasııalar qyzmetinde ótken baspasóz máslıhatynda «Qazgıdromet» RMK dırektory Danara Álimbaeva tamyz aıynyń aýa raıy boljamyn jarııalady.
«Tamyz – jazdyń sońǵy aıy. Aýanyń ortasha temperatýrasy tamyz aıynda shilde aıyna qaraǵanda soltústikte 2-2,5 gradýsqa, al ońtústik oblystarda 1 gradýsqa tómen bolady. Qazaqstannyń soltústiginde aýanyń ortasha aılyq temperatýrasy 16-20 gradýsqa, ońtústikke qaraı joǵarylaı otyryp qıyr ońtústikte 27-29 gradýsqa jetedi. Konsýltatıvti boljamǵa sáıkes jazdyń sońǵy aıy klımattyq norma shamasynda bolady dep kútilýde. Tamyzda aýanyń ortasha aılyq temperatýrasy Qazaqstan aýmaǵynyń basym bóliginde qalypty bolady. Soltústik jartysynda norma – 17-22 gradýs», dedi Danara Álimbaeva.
Onyń aıtýynsha, shyǵys aımaqtardyń taýly-bókterli aýdandarynda 15-16 gradýs, batys jáne ońtústik aımaqtarda 23-27 gradýs shamasynda saqtalady. Aýa temperatýrasy qalypty shamada bolady.
«Osyǵan qaramastan aýa massalarynyń jıi almasýyna baılanysty jaýyn-shashynsyz ystyq kúnder men salqyn, jaýyndy kúnder qatar bolady. Bul Skandınavııa aımaǵynan sýyq aýa massalarynyń enýine jáne Jerorta teńizi men Irannan shyǵatyn ońtústik sıklondarmen baılanysty. Tamyz aıynda jaýyn-shashyn mólsheri resýpblıkanyń basym bóliginde qalypty bolady. Respýblıkanyń ońtústiginde qalypty – 2-9 mm, batys pen ortalyq – 11-24 mm. Normadan kóp kútiletin óńirler: Soltústik Qazaqstan oblysynda – 40-53 mm, Qostanaı oblysynda – 17-55 mm, Aqmola oblysynda – 20-41 mm, Pavlodar oblysynyń soltústik batysynda – 23-40 mm, Qaraǵandy oblysynda – 11-17 mm, Batys Qazaqstan jáne Aqtóbe oblystarynyń soltústiginde – 17-27 mm, Almaty oblysynyń taýly jáne taý-bókterli aýdandarynda – 18-90 mm», dedi «Qazgıdromet» RMK dırektory.