Petropavldyq zeınetker ınternet-alaıaqtyń arbaýyna túspedi, dep habarlaıdy Egemen.kz
Keshqurymǵy apaq-sapaqta Petropavldyń qart turǵyny Larısa Vladımırovanyń telefony shar etken. Mundaı ýaqytta ony eshkim mazalaı qoımaıtyn, sondyqtan keıýana birden sekem alyp qalady. Telefondy kótergende ar jaqtaǵy daýys ózin banktyń qaýipsizdik qyzmetinenmin dep tanystyryp, "sizdiń bankidegi esepshotyńyzǵa bireýler buzyp kirmek boldy, biz ony dereý anyqtaýymyz kerek, sondyqtan bizge kartańyzdyń nomerin tez aıta qoıyńyz", dep digirleıdi.
Alǵashynda sasyp qalǵanymen, teledıdardan ınternet-alaıaqtyq týraly kóp estigen 67 jasar keıýana ózin ózi qolǵa alyp, júregin toqtatyp: "Men sizderge eshteńe de aıtpaımyn, erteń bankke baryp, bárin ózim anyqtaımyn", degende anaý jaqtaǵy adam baılanysty kilt úzedi. Teksermek bolyp onyń nómirine qaıta habarlasqanda, eshkim telefondy kótermeıdi.
О́ziniń bastan keshken oqıǵasyn Larısa Vladımırova polısııaǵa da habarlap, olardy qulaǵdar qylady. Búgingi tańǵa deıin dál osyndaı 18 oqıǵa tirkelgen eken. Barlyq ýaqytta alaıaqtar zeınetkerlerdiń ańǵaldyǵyn paıdalanyp, kýálikteriniń jeke sáıkestendirý nómirlerin, kartalarynyń nómirlerin, qupııa sózderin surap alady. Osydan keıin kartadaǵy aqshany aýdarý olarǵa op-ońaı. Krımınaldyq polısııa qyzmetkerleri pandemııa bastalǵannan beri ınternet-alaıaqtardyń barynsha qarqyn alǵanyn aıtady.
"Alaıaqtar bank qyzmetkerleri atynan habarlasyp, klıentterge olardyń kartalary boıynsha kúdikti aýdarymdar júrgizilip jatqany týraly habarlaıdy. Sendirý úshin alaıaqtar bankterdiń, olardyń CALL-ortalyqtarynyń nómirlerin túrli baǵdarlamalar arqyly kóshirip alyp, qońyraý shalady. Telefon arqyly sóılesken kezde olar banktegi qaýipsizdik qyzmetkerleriniń rólin sheber atqarady. Bank termınderin qoldanyp, áńgimelesýdi sypaıy jáne senimdi túrde júrgizedi. Alaıaqtar adamnyń ózine senip qalǵanyn túsingen kezde, tranzaksııany toqtatý úshin JSN men tólem kartochkalarynyń derektemelerin surap alady", deıdi SQO PD bastyǵynyń orynbasary, polısııa polkovnıgi Rýslan Nazarov.
Jyl basynan Petropavlda ınternet-alaıaqtyqtyń 183 faktisi tirkelgen.