Toǵyz mıllıonynshy qazaqtar pátersiz qalǵaly tur

Atyraý oblysynda elimizdiń 9 mıllıonynshy qazaǵyna tartý etilgen páterdi ákimdik qaıtyp alǵaly jatyr. Bul týraly KTK arnasy habarlady.

Atyraý oblysynda elimizdiń 9 mıllıonynshy qazaǵyna tartý etilgen páterdi ákimdik qaıtyp alǵaly jatyr. Bul týraly KTK arnasy habarlady.

Budan jeti jyl buryn Inder aýdanyndaǵy Ázer­­­­­­baevtar áýletinde egiz balalar dúnıege kelgen. Qazaqstannyń 9 mıllıonynshy qazaǵy atanǵan búldir­­­­shinderge arnap, sol kezdegi aýdan ákimdigi úsh bólmeli páterdi syıǵa tartqan. Biraq egizdiń ata-anasy úıdi áli kúnge deıin óz attaryna aýdara almaı keledi.

Egizderdiń atasy Maqtym Ázerbaev qos nemeresi dúnıege kelgende jarııalanǵan maqalalardy muqııat saqtap qoıypty. Barlyǵy da Ásem men Ásetke páter berilgenin qýana habarlapty. Biraq Ázerbaevtar áýleti bul qýanyshtyń aldamshy ekenin sol kezde bilmese kerek. Aýdan ákimdigi úıdiń bıýdjetten berilgenin aıtqanymen, jekeshelendirýge jatpaıtynyn eskertýdi «umytyp ketipti».

«Bul másele birneshe jyldan beri sozylyp keledi. Ákimdiktiń kesirinen dep oılaımyz. Memlekettiń bizge bergen páterin jalǵa berem degen sheshim kabyldap otyr. Ol úshin aı saıyn 3 myń teńge tólep otyrý kerek. Biz muny satyp bergen páter dep esepteımiz!», – deıdi Maqtym Ázerbaev.

Áset pen Ásem qazir 1-synypqa baryp júr. Árıne, 9 mıllıonynshy qazaq retinde alǵan páterleriniń sońy daýǵa aınalyp bara jatqanyn búldirshinder bilmeıdi. Al aýdan basshylyǵy jaǵdaımen jaqsy tanys. Tipti, máseleni sheshýge de talpyndyq dep sendirip otyr. Biraq elimizdegi turǵyn úı zańy syıǵa berilgen páterdi jekeshelendirýge múmkindik bermeıtin kórinedi.

«Maqtym Ázerbaev joldastyń úıdi jekeshe­­­­­­len­dirip berý týraly suranysyn qanaǵattandyrýǵa múm­kindik joq. Biraq bolashaqta zańda ózgerister bol­ǵan jaǵdaıda bul ótinishti qanaǵattandyrýǵa ty­ry­samyz jáne únemi baqylaýda ustaımyz», – deıdi Inder aýdany ákiminiń orynbasary Álıfolla Balahmetov.

Ákimniń orynbasary bolashaqty boljap otyrǵanda egizderdiń ata-anasy syıǵa alǵan páterdi aqyry memleketke qaıtarýy tıis. Degenmen, áýelde basybútin berilmeıdi dep eskertýdi umytqan basshylyq kinálaryn túsingen bolar, ázirshe, úıdi panalaı turýǵa ruqsat beripti.

Aıtqandaı, egizderdiń ókil ákesi Atyraýǵa belgili kásipker, Májilistiń burynǵy depýtaty Bolat Qonarbaı degen azamat. Kezinde ózin ókil áke jarııalap, tipti «Bir apta ishinde úı tabyńdar, aqshasyn ózim tóleımin» degen eken. Alaıda, ýádesin sol kúıi umytqan sııaqty.

Qurysh NURYMBET.