Osy jyldyń 7 aıynda Qyzylorda oblysy Polısııa departamenti jedel basqarý ortalyǵynyń "102" arnasyna 24 myńnan astam qońyraý kelip tústi jáne polısııa quzyretine sáıkes 23 myń habarlamaǵa qyzmet kórsetildi, dep habarlaıdy Egemen.kz
Jyl basynan beri beınebaqylaý kamerasynyń kómegimen 67 qylmys ashyldy. Beınebaqylaýshylar azamattardan kelip túsken habarlamalardy qabyldaý jáne óńdeý barysynda barlyq kúdikti áreketterdi, adamdardyń minez-qulqyn jáne kameraǵa túsken kúmándi adamdardy jedel tekseredi.
Mysaly, 2020 jyldyń 17 aqpanynda Qyzylorda qalalyq PB jedel basqarý ortalyǵynyń beınebaqylaý ınspektory saǵat 03:30-da kafeniń janynda belgisiz bireý qyzdy uryp-soǵyp, oqıǵa ornynan qashyp ketkenin baıqaǵan. Sanaýly sekýndta Jeltoqsan kóshesindegi kameralardy sholý barysynda, kafelerdiń birinde úsh adam bir-birimen tóbelesip jatqanyn baıqap, dereý kezekshi ınspektor patrýldik polısııa narıadyn oqıǵa ornyna jiberip, kúdikti ustaldy. Keıin qyzdy uryp-soqqan buzaqynyń Qazaly aýdanynyń 26 jastaǵy turǵyny ekeni anyqtaldy.
8 tamyzda "Quqyqtyq tártibi" jedel profılaktıkalyq is-sharasy barysynda beınekamera boıynsha baqylaý ınspektory túngi saǵat 3-te oblys ortalyǵynda kúdikti jas jigitti baıqaıdy. Tekserý úshin polısııa narıady jiberildi. Kelgen patrýldik polıseılerdi kórip, eshqandaı túsindirmesiz qasha jónelgen. Ol ustalǵannan keıin sómkesinde travmatıkalyq tapansha bolǵandyǵy anyqtaldy. Oqıǵanyń mán-jaıy anyqtalýda.
Aıta keteıik, jyl basynan beri beınebaqylaý kameralarynyń kómegimen 10 myńǵa jýyq ákimshilik quqyq buzýshylyq, onyń ishinde 8 myńnan astam jol qozǵalysy erejelerin buzý anyqtalǵan.