SQO Maǵjan Jumabaev aýdanynyń jergilikti ýchaskelik polısııa ınspektoryn Sybaılas jemqorlyqqa qarsy ulttyq bıýro departamentiniń qyzmetkerleri 150 myń teńge para alǵaly jatqan jerinde ustap, ýaqytsha ustaıtyn oqshaýlaǵyshqa qamaldy, dep habarlaıdy Egemen.kz
Ol parany ákimshilik buzýshylyq jasaǵan adamnan talap etken eken. Aıyppul salý týraly hattama toltyrmaýdyń qunyn paraqor osynsha aqshaǵa baǵalapty.
Keshe oblystyq polısııa Tártiptik komıssııasynyń otyrysy bolyp, para alǵan adam teris qylyq jasaǵany úshin ishki ister organdarynan shyǵarylyp, arnaıy ataǵynan da aıryldy. Ústinen qylmystyq is qozǵalyp, keıingi taǵdyryn sot sheshedi.
Onyń tikeleı basshysy – aýdandyq polısııa bólimi bastyǵynyń orynbasary da qyzmetinen bosatyldy. Sondaı-aq, polısııa bólimi men oblystyq apparattyń 11 basshysy qatań tártiptik jaýapkershilikke tartyldy.
"Karantın kezinde óziniń áriptesteri mindetterin adal atqaryp júrgende, jas ofıser óziniń is-áreketimen bizdiń qyzmetimizdiń atyna kir keltirdi. Bul fakti halyq arasynda teris oı qalyptastyrady. Dál osyndaı qatań ustanym qandaı ataq pen laýazym bolmasyn kez-kelgen jemqorǵa qatysty bolady jáne solaı bola bermek. Ár qyzmetkerdi buıryqpen tanystyryp, jaǵdaıdy jarııalap otyrý kerek", dedi Soltústik Qazaqstan oblysy PD bastyǵy, polısııa polkovnıgi Marat Tólebaev.