Búgin túnde Eýropa lıgasynyń jartylaı fınaldyq oıyndary aıasynda «Sevılıa» (Ispanııa) «Manchester Iýnaıtedke» (Anglııa) qarsy alańǵa shyǵady. Atalǵan kezdesýdi «Qazsport» telearnasy (Nur-Sultan ýaqytymen saǵat 00:50-de) kórsetedi.
Sońǵy 15 jylda Eýropa lıgasynyń kýbogyn bes márte jeńip alǵan «Sevılıa» bul týrnırde basty fovorıtterdiń biri. Alaıda jartylaı fınalǵa shyqqan komandalardyń barlyǵy «sen tur, men ataıyndar». Condyqtan bul joly da «nervıondyqtar» úshin aýyr synaq kútip tur. Nege aýyr synaq? Sebebi buǵan deıin olar 1/8 fınalda azýly «Roma» komandasyn 2:0 esebimen jeńdi. Shırek fınalda Anglııanyń «Výlverhempton» fýtbolshylarynan basym tústi. Endi mine olardyń jolyna MIý kedergi bolmaqshy. Áıtkenmen, ¼ fınalda «Výlverhempton» komandasyna qurǵan taktıkasy men oıyn órnegin kórsetse, Hýlen Lopetegı shákirtteri qarsylasyn sózsiz jeńedi.
«Výlverhempton» bıylǵy APL-da «Manchester Iýnaıtedpen» eki márte teń túskenin eskersek, MIý-diń deńgeıi «Výlverhemptonmen» shamalas deýge de bolady. Onyń ústine ¼ fınalda «Qyzyl soıqandar» Eýropanyń ortańqol komandasy Danııanyń «Kopengagenin» negizgi ýaqytta jeńe almady. Tek qosymsha ýaqyttyń 95-mınýtynda 11 metrlik penaltıden Brýno Fernandesh soqqan goldyń arqasynda kelesi kezeńge shyqty.
Soǵan qaramastan, býkmekerlik keńse MIý-di favorıt dep esepteıdi. Olardyń da bir bilgeni bar shyǵar. «Sevılıanyń» jeńisine 3.04, «Manchester Iýnaıtedtiń» jeńisine 2.60 koeffısıent berip otyr. Teń nátıjege – 3.30.
Derekter:
- Qarsylastar Chempıondar lıgasynyń 1/8 fınalynda (2017/2018) bir-birimen kezdesti: Ispanııada esep ashylmasa, MIý óz alańynda 1:2 esebimen jeńildi;
- «Sevılıa» ÝEFA reıtıngisinde 10-orynda, «Manchester Iýnaıted» – 8-orynda;
- «Sevılıa» da, «Manchester Iýnaıted» te óz toptarynda birinshi oryn aldy;
- «Sevılıa» – týrnırdiń bes dúrkin jeńimpazy, «Manchester Iýnaıted» 2017 jyly Eýropa lıgasyn jeńip aldy;
- «Sevılıa» Eýropa lıgasynyń jartylaı fınalynda 5 ret oınap, barlyǵynda da fınalǵa shyqqan;
- «Sevılıa» qatarynan 19 matchta jeńilgen joq.
- MIý qatarynan 4 matchta jeńilgen joq.
«Sevılıa» – «Manchester Iýnaıted»
Kıoln. Stadıon «Raın-Energı». 00:50.
Bas tóreshi - Felıks Bryh (Germanııa).
Telekórsetilim – «Qazsport» telearnasy.