Qarjy mınıstrligi tıisti zań arqyly memlekettik satyp alýlardy tolyǵymen avtomattandyrýdy kózdep otyr. Iаǵnı tender kezinde konkýrstyq komıssııalar bolmaıdy. Bul týraly Ortalyq kommýnıkasııalar qyzmetinde ótken baspasóz jıynynda Qarjy mınıstrligi Memlekettik satyp alý zańnamasy departamentiniń dırektory Sábıt Ahmetov aıtty.
Atalǵan departament dırektorynyń aıtýynsha, aldaǵy ýaqytta memlekettik satyp alýlar portalynda jeńimpaz upaı sany, baǵa men sapa kórsetkishteri eskerile otyryp anyqtalady.
– Memlekettik satyp alýlardy ótkizý tártibi ózgeredi. Bul salada taýar men qyzmetti jetkizýshi kompanııany tańdaý kezinde adam faktoryn tolyǵymen joıý qajet. Sonda sybaılas jemqorlyq bolmaıdy. Osyǵan baılanysty biz memlekettik satyp alýlardyń jańa tásilin pysyqtap jatyrmyz. Onda reıtıngtik baldyq júıe qoldanylady. Mundaı satyp alý rásimine adam múldem aralaspaıdy. Konkýrstyq komıssııa da bolmaıdy, – dedi S.Ahmetov.
Spıker atap ótkendeı, memlekettik satyp alýlar portalynda taýar men qyzmetti jetkizýshilerdiń reıtıngin engizý usynylyp otyr. Máselen, eńbek tájirıbesi, qarjylyq turaqtylyq, kepildik merzimi jáne taǵy basqa kórsetkishter úshin upaı beriledi. Al qaryz ben aıyppuldary bolsa, teris upaı jazylady. Sonyń negizinde reıtıng jasalady.
– Mundaı tájirıbe Ońtústik Koreıada bar. Bul el álem boıynsha memlekettik satyp alýlardyń elektrondy júıesi jaǵynan kóshbasshy elderdiń qataryna kiredi, – dep túsindirdi S.Ahmetov.
Baspasóz máslıhaty barysynda tıisti departament dırektory Parlament Májilisinde memlekettik satyp alýlar máselelerine arnalǵan zań jobasy jatqanyn da jetkizdi. Barlyq ózgeris osy qujattyń aıasynda qolǵa alynady.