Elimizde «Nur Otan» partııasynyń praımerızine ótinish berý jalǵastyrýda. Tirkeýdiń aıaqtalýyna bir kún qaldy. Búginge deıin 10 myńnan astam ótinish kelip túsip, olardyń ishinde 8 915 adam kandıdat retinde tirkeldi.
Jarııalanǵan aqparatqa sáıkes, kandıdattardyń 36,4%-y – áıelder, 28,9%-y – 35 jasqa deıingi jastar. Bastaýysh partııa uıymdarynan 3 023 kandıdat usynylsa, 6 978 – ózin-ózi usynýshylar.
Partııaishilik irikteýge qatysýǵa nıet bildirgenderdiń jas erekshelikteri men áleýmettik toptary ártúrli. Sonymen qatar, qazirgi máslıhat depýtattary da ózderin osy praımerızde synap kórýdi josparlap otyr.
Solardyń biri – Pavlodar aýdandyq máslıhatynyń depýtaty, «Aýyl – memlekettiń tiregi» jobasynyń negizin qalaýshy Dmıtrıı Korepanov.
«Qalada dúnıege keldim, biraq 2013 jyly aýyldy kórkeıtýge, Aýyl sharýashylyǵyn damytýǵa kúsh salamyn dep sheshtim. Aýyl turǵyndary men aýyl sharýashylyǵy taýar óndirýshileriniń ushyrasatyn qıynshylyqtaryn bir kisideı bilemin. Búginde agrarlyq sektorda maman tapshylyǵy seziledi. Ásirese, jas mamandar jetispeıdi. Sondyqtan qazir jastardy kásiptik beıimdeýge, olardy fermerlik, veterınarlyq jáne agrarlyq iske oqytýǵa baǵyttalǵan jobany iske asyrýdamyn. Praımerız – partııalyq demokratııany jandandyrýdyń pármendi tetigi. Saıasatta tájirıbesi bar ma, joq pa, ol jaǵy mańyzdy emes, árbir kandıdattyń múmkindigi bar», - dep óz oıymen bólisti Dmıtrıı Korepanov.
Dodaǵa túsip, partııalastarynyń daýysyna ıe bolýǵa burynǵy oblys ákimderi de úmitti.
Mysaly, Qyzylorda oblysynyń eks-ákimi Bolatbek Qýandyqov. Sondaı-aq, Soltústik Qazaqstan oblysynyń burynǵy ákimi Samat Eskendirov te saılanbaly organdarda partııalastarynyń múddelerin bildirýge nıettenip otyr.
Qazaqstan aıtys aqyndary men jyrshy-termeshileri halyqaralyq odaǵynyń tóraǵasy Júrsin Erman da praımerızge qatysady. «Nur Otan» partııasy mádenıet pen dástúrdi damytýdy, otbasylyq qundylyqtardy nasıhattaýdy únemi qoldap keledi. Qazir halyqtyń sanasy oıanǵan. Qoǵamda úlken ózgeristiń bolatynyna senedi. Sol ózgeristiń ortasynda ultqa jany ashıtyn, qany qazaqy, jany qazaqy, eldiń erteńin oılaıtyn azamattar bolýy qajet. Eldiń jaǵdaıyn biletin, halyqpen, onyń ishinde aýylmen qatynasyn úzbegen ultjandy adamdar kerek-aq. Sonda solardyń asyǵy alshysynan túsedi dep oılaımyn», - dedi aıtys janashyry.
Aıta keteıik, osy kúnderi «Nur Otan» partııasy Jaqtastary lıgasynyń ókilderi halyqpen kezdesip, kandıdattardy tirkeý jáne praımerızderdiń kelesi kezeńderine daıyndyq barasymen tanysý úshin óńirlerge attanyp ketti. Olar saparlarynyń qorytyndysy boıynsha partııaǵa tıisti usynystar beredi.
Eske sala keteıik, «Nur Otan» praımerızine kandıdattardy usyný jáne tirkeý 28 tamyzda aıaqtalady. Oǵan qatysý úshin ótinishti https://primaries.kz/ saıtynda «Praımerız» aqparattyq júıesi arqyly onlaın joldaýǵa nemese aýmaqtyq uıymdastyrý komıtetterine jeke ótinish berýge bolady.
Partııa qundylyqtaryn ustanatyn jáne saılaý quqyǵy bar kez kelgen azamat úmitker bola alady. Ol úshin praımerızge qatysýshylardy tirkeý merzimi aıaqtalǵanǵa deıin «Nur Otan»-nyń qataryna qosylý kerek.
Praımerız ótkizý máseleleri boıynsha arnaıy 8 (800) 080 4441 jedel jeli iske qosyldy.